जनसेवेचा वसा अन् विधान परिषदेची आशा !
जळगाव (प्रतिनिधी) : राजकारणात वारसा मिळणे सोपे असते, पण तो वारसा स्वकर्तृत्वाने सिद्ध करणे कठीण. राज्याचे पाणीपुरवठा व स्वच्छता मंत्री ना. गुलाबराव पाटील यांचा राजकीय वारसा समर्थपणे पुढे नेणारे, जिल्हा परिषदेचे माजी सदस्य प्रतापराव पाटील यांचा मंगळवारी वाढदिवस. मात्र, यंदाचा हा वाढदिवस केवळ अभिष्टचिंतनाचा सोहळा नसून, त्यांच्या आगामी राजकीय गरुडझेपेची नांदी मानला जात आहे.
प्रताप पाटील यांनी आपली राजकीय कारकीर्द ग्रामपंचायतीपासून सुरू केली. केवळ मोठ्या नेत्याचा मुलगा ही ओळख मागे सारून त्यांनी जिल्हा परिषद सदस्य म्हणून काम करताना ग्रामीण भागातील प्रश्नांची सखोल जाण निर्माण केली. आज जळगाव जिल्ह्यातील ग्रामीण भागात त्यांचे स्वतःचे एक स्वतंत्र वलय आहे. मतदारसंघातील लहानांपासून थोरांपर्यंत त्यांचा असणारा थेट संवाद आणि कार्यकर्त्यांच्या सुख-दुःखात धावून जाण्याची वृत्ती, हीच त्यांच्या लोकप्रियतेची खरी ताकद आहे.
राजकारणा पलीकडे जाऊन प्रताप पाटील यांनी समाजकारणात आपला ठसा उमटवला आहे.
आरोग्य सेवा: वैद्यकीय मदतीची गरज असलेल्या कुटुंबांसाठी ते नेहमीच ‘संकटमोचक’ ठरले आहेत. युवा संघटन: आक्रमक कार्यशैली आणि संयमी स्वभाव यांमुळे जिल्ह्यातील तरुणांमध्ये त्यांची मोठी क्रेझ आहे.जनसंपर्क: मतदारसंघातील तळागाळातील कार्यकर्त्यांशी त्यांचे कौटुंबिक नाते आहे, ज्यामुळे महायुतीमध्ये त्यांची पकड मजबूत आहे.
सध्या राजकीय वर्तुळात चर्चा आहे ती म्हणजे आगामी विधान परिषद निवडणुकीची. महायुतीच्या जागावाटपात जर ही जागा शिवसेनेच्या (शिंदे गट) वाट्याला आली, तर प्रताप पाटील यांचे नाव सर्वात आघाडीवर आहे. त्यांच्याकडे असलेली निवडून येण्याची क्षमता आणि दांडगा जनसंपर्क पाहता पक्षश्रेष्ठी त्यांच्या नावावर शिक्कामोर्तब करण्याची दाट शक्यता वर्तवली जात आहे. प्रतापराव हे केवळ एक नेते नसून कार्यकर्त्यांच्या कुटुंबातील आधारवड आहेत. त्यांच्या वाढदिवसानिमित्त त्यांना विधान परिषदेची उमेदवारी मिळणे, हीच प्रत्येक कार्यकर्त्यासाठी खरी भेट असेल.
जळगाव जिल्ह्याचे लक्ष लागून असलेल्या या राजकीय घडामोडीत, प्रतापराव पाटील यांना विधान परिषदेची संधी मिळून त्यांच्या रूपाने एक तरुण आणि अभ्यासू नेतृत्व सभागृहात जाणार का? याचे उत्तर लवकरच मिळेल. तूर्तास, त्यांच्या वाढदिवसानिमित्त त्यांच्यावर शुभेच्छांचा वर्षाव होत आहे.
