आरोपीच्या अटकेसाठी ग्रामस्थांचे एक तास ठिय्या आंदोलन
जळगाव (प्रतिनिधी):- शिरसोली येथे भारतरत्न डॉ. बाबासाहेब आंबेडकर यांच्या जयंतीनिमित्त लावलेले बॅनर अज्ञात समाजकंटकाने फाडून त्याचा व्हिडिओ सोशल मीडियावर स्टेटस म्हणून ठेवल्याचा संतापजनक प्रकार समोर आला आहे. या घटनेचे वृत्त गावात वाऱ्यासारखे पसरताच ग्रामस्थ आणि समाजबांधवांनी बस स्थानक परिसरात मोठा जमाव केला. आरोपीला तात्काळ अटक करून कठोर कायदेशीर कारवाई करण्याच्या मागणीसाठी रिपब्लिकन पार्टी ऑफ इंडियाचे पदाधिकारी, कार्यकर्ते आणि ग्रामस्थांनी तब्बल एक तास ठिय्या आंदोलन केल्याने परिसरात मोठा तणाव निर्माण झाला होता.
शिरसोली येथील बस स्थानकावर जयंतीनिमित्त बॅनर लावण्यात आले होते. काल एका जणाने हे बॅनर फाडले आणि त्याचा व्हिडिओ (रील) बनवून सोशल मीडियावर स्टेटस म्हणून ठेवला. या प्रकारामुळे समाजात तीव्र संताप व्यक्त करण्यात आला. घटनेची माहिती मिळताच एमआयडीसी पोलीस स्टेशनचे पोलीस निरीक्षक बबन आव्हाड आपल्या ताफ्यासह तातडीने घटनास्थळी दाखल झाले.
आंदोलकांनी यावेळी आक्रमक पवित्रा घेत जोपर्यंत आरोपीला बेड्या ठोकल्या जात नाहीत, तोपर्यंत मागे न हटण्याचा निर्धार केला होता. अखेर पोलीस निरीक्षक बबन आव्हाड यांनी दोषीवर कठोर कायदेशीर कारवाई करण्याचे आश्वासन दिल्यानंतर ग्रामस्थांनी आपले आंदोलन मागे घेतले. या घटनेमुळे गावात काही काळ तणावाचे वातावरण होते, मात्र पोलिसांनी वेळीच मध्यस्थी करून वाद मिटवला. सध्या पोलीस या प्रकरणाचा अधिक तपास करत असून समाजकंटकावर कडक कारवाई करण्याची मागणी जोर धरत आहे.
