धरणगाव तालुक्यात शोककळा
धरणगाव (प्रतिनिधी):- साळवा येथून दुचाकीने जळगावकडे येत असलेल्या एका ७५ वर्षीय वृद्धाला अज्ञात वाहनाने जोरदार धडक दिली. या भीषण अपघातात वृद्धाचा जागीच मृत्यू झाला. ही हृदयद्रावक घटना शुक्रवारी दुपारी ३ वाजेच्या सुमारास धरणगाव तालुक्यातील पथराड फाट्याजवळ घडली. सतीश काशीनाथ जोशी (वय ७५, मूळ रा. साळवा नांदेड, ता. धरणगाव) असे मृत वृद्धाचे नाव आहे. जोशी हे सध्या जळगाव येथील एसएमआयटी कॉलेजजवळील शिनू बंगलो येथे वास्तव्यास होते.
मुलीकडे जाताना काळाचा घाला
मिळालेल्या माहितीनुसार, सतीश जोशी हे शुक्रवारी दुपारी साळवा येथून आपल्या मुलीला भेटण्यासाठी जळगावकडे दुचाकीने जात होते. पथराड फाट्याजवळ आले असता, त्यांच्या दुचाकीला एका अज्ञात वाहनाने पाठीमागून जोरदार धडक दिली. धडक इतकी भीषण होती की, जोशी यांचा जागीच मृत्यू झाला.
पोलिसांची तत्परता आणि प्रामाणिकपणा
अपघाताची माहिती मिळताच पाळधी दूरक्षेत्राचे सहाय्यक पोलीस निरीक्षक सचिन कंडारे यांनी तातडीने पथकासह घटनास्थळी धाव घेतली. पोलिसांनी रस्त्यावरील वाहतूक सुरळीत करून मृतदेह उत्तरिय तपासणीसाठी शासकीय वैद्यकीय महाविद्यालयात पाठवला. विशेष म्हणजे, पंचनामा करताना मृत जोशी यांच्या खिशात १५ हजार रुपयांची रोकड आढळून आली. ही रक्कम पोलिसांनी प्रामाणिकपणे त्यांच्या नातेवाईकांच्या स्वाधीन केली.
कुटुंबीयांवर शोककळा
या अपघातामुळे जोशी कुटुंबावर दुःखाचा डोंगर कोसळला आहे. शासकीय वैद्यकीय महाविद्यालयात नातेवाईकांनी मोठा आक्रोश केला. त्यांच्या पश्चात पत्नी, मुलगी, जावई असा मोठा परिवार आहे. या प्रकरणी रात्री उशिरापर्यंत अज्ञात वाहन चालकाविरुद्ध पोलीस ठाण्यात गुन्हा दाखल करण्याची प्रक्रिया सुरू होती.
