अट्रावल येथील ९ जणांविरुद्ध गुन्हा दाखल
यावल (प्रतिनिधी):- ग्रामपंचायतीच्या कामाबाबत माहिती अधिकारात अर्ज केल्याचा आणि गावातील अवैध धंद्यांचे व्हिडिओ काढल्याचा राग मनात धरून एका ५५ वर्षीय महिलेवर प्राणघातक हल्ला केल्याची धक्कादायक घटना अट्रावल (ता. यावल) येथे घडली आहे. याप्रकरणी यावल पोलीस ठाण्यात नऊ जणांविरुद्ध खुनाचा प्रयत्न आणि दंगलीसह विविध कलमान्वये गुन्हा दाखल करण्यात आला आहे.
फिर्यादी माया अनिल तायडे (वय ५५, रा. अटावल) यांची सून नयना बादल तायडे हिने ग्रामपंचायतीच्या कामकाजाबाबत माहिती अधिकारात अर्ज केला होता. तसेच तिने गावातील अवैध धंद्यांचे व्हिडिओ देखील काढले होते. याचाच राग आरोपींच्या मनात होता. दि. २८ मार्च रोजी रात्री ८ वाजेच्या सुमारास, माया तायडे या आपल्या घरात असताना संशयित आरोपींनी बेकायदेशीर मंडळी जमवून त्यांच्या घरात प्रवेश केला. “तू माहिती अधिकार का टाकते? व्हिडिओ का बनवते?” असे म्हणत आरोपींनी शिवीगाळ करण्यास सुरुवात केली.
या वादाचे रूपांतर हाणामारीत झाले. आरोपी तुषार दिलीप तायडे आणि रिंकू आनंदा तायडे यांनी लाकडी काठीने माया तायडे यांना बेदम मारहाण केली. यावेळी संशयित आरोपी तुषार तायडे याने फिर्यादीला जीवे मारण्याच्या उद्देशाने एखाद्या धारदार वस्तूने वार करून गंभीर दुखापत केली. इतर आरोपींनी त्यांना लाथाबुक्क्यांनी मारहाण करत “तुमचे हातपाय तोडून टाकू” अशी धमकी दिली.
याप्रकरणी माया तायडे यांनी दिलेल्या फिर्यादीवरून ९ जणांविरुद्ध गुन्हा दाखल करण्यात आला आहे. तुषार दिलीप तायडे, रिंकू आनंदा तायडे, करुणेश तुषार तायडे, कविता तुषार तायडे, आरती अरविंद भालेराव, विजया दिलीप तायडे, उषा आनंदा तायडे, विक्की मारुती तायडे, अरविंद भालेराव (सर्व रा. अटावल, ता. यावल) असे संशयित आरोपींचे नाव आहे.
घटनेची माहिती मिळताच उपविभागीय पोलीस अधिकारी अनिल बडगुजर आणि पोलीस निरीक्षक रंगनाथ धारबळे यांनी घटनास्थळी भेट दिली. याप्रकरणी गुन्हा नोंदवण्यात आला आहे. पुढील तपास सहाय्यक पोलीस निरीक्षक अजयकुमार वाढवे हे करीत आहेत.
