रामबाग कॉलनी परिसरात ३ लाखांच्या मुद्देमालाची चोरी
रावेर (प्रतिनिधी):- येथील रामबाग कॉलनी परिसरात भरवस्तीत असलेल्या एका बंद घराचे खिडकीचे ग्रील तोडून चोरट्यांनी आत प्रवेश केला आणि कपाटाचे कुलूप तोडून सुमारे २ लाख ९८ हजार रुपये किमतीचे सोन्या-चांदीचे दागिने चोरून नेल्याची घटना उघडकीस आली आहे. या प्रकरणी रावेर पोलीस ठाण्यात अज्ञात चोरट्यांविरुद्ध गुन्हा दाखल करण्यात आला आहे.
रामबाग कॉलनीतील समृद्धी हॉस्पिटल जवळ राहणारे फिर्यादी दिलीप हिरामण पाटील (वय ५६) यांच्या घरात ही चोरी झाली. दि. १९ मार्चच्या रात्री ११:३० ते २० मार्चच्या पहाटे ५ वाजेच्या दरम्यान चोरट्यांनी संधी साधली. अज्ञात चोरट्याने घराच्या मागील बाजूस असलेल्या, फिर्यादींचा मुलगा ध्रुव पाटील याच्या बेडरूमच्या खिडकीची लोखंडी ग्रील तोडली. चोरट्यांनी बेडरूममध्ये प्रवेश करून तेथील लाकडी कपाटाचे कडी-कोयंडा तोडला आणि कपाटातील सोन्या-चांदीचे दागिने लंपास केले.
चोरट्यांनी एकूण २,९८,००० रुपयांचा ऐवज लंपास केला आहे. घटनेची माहिती मिळताच रावेर पोलिसांनी घटनास्थळी धाव घेतली. उपविभागीय पोलीस अधिकारी अनिल बडगुजर यांनी घटनास्थळाला भेट देऊन पाहणी केली आहे. रावेर पोलीस ठाण्याचे पोलीस निरीक्षक विशाल जयस्वाल यांच्या मार्गदर्शनाखाली पुढील तपास सुरू आहे.
