जलसंपदा विभागाचा कडक इशारा
जळगाव (प्रतिनिधी):- जळगाव जिल्ह्यातील हतनूर, वाघूर, सुकी, तोंडापूर आणि बहुळा या प्रकल्पांमधून बिगर सिंचन (औद्योगिक व पिण्यासाठी) पाणीपुरवठा घेणाऱ्या विविध संस्था आणि नगरपालिकांकडे कोट्यवधी रुपयांची पाणीपट्टी थकली आहे. वारंवार मागणी करूनही थकबाकी न भरल्याने, आता जलसंपदा विभागाने कठोर पाऊल उचलले असून २७ मार्च २०२६ पर्यंत थकबाकी न भरल्यास जळगाव व मलकापूर येथील पाणीपुरवठा बंद करण्याचा इशारा दिला आहे.
जळगाव पाटबंधारे विभागाने प्रसिद्ध केलेल्या जाहीर प्रकटनानुसार, जळगाव महानगरपालिका, मध्य रेल्वे भुसावळ, औष्णिक विद्युत केंद्र दीपनगर यांसारख्या मोठ्या संस्थांसह अनेक नगरपालिकांकडे मोठी थकबाकी आहे. कार्यकारी अभियंता, जळगाव पाटबंधारे विभाग यांनी स्पष्ट केले आहे की, संबंधित संस्थांनी २७ मार्च २०२६ पूर्वी आपल्या थकबाकीचा भरणा करावा. या मुदतीत पैसे न भरल्यास नियमानुसार पाणीपुरवठा बंद करण्यात येईल. यामुळे नागरिकांची किंवा उद्योगांची जी काही गैरसोय किंवा नुकसान होईल, त्याला सर्वस्वी संबंधित संस्था जबाबदार राहतील, असेही प्रशासनाने बजावले आहे.
या कारवाईमुळे जळगाव जिल्ह्यातील अनेक शहरांच्या पाणीपुरवठ्यावर परिणाम होण्याची शक्यता निर्माण झाली असून, आता संबंधित स्थानिक स्वराज्य संस्था काय भूमिका घेतात, याकडे सर्वांचे लक्ष लागले आहे.
थकबाकीदार संस्था, योजना आणि त्यांची थकबाकी (रुपये लाखात)
मध्य रेल्वे भुसावळ – ३२४४.६४, २. औष्णिक विद्युत केंद्र दीपनगर (टप्पा-२) – १५३६.३०, ३. जळगाव महानगरपालिका, जळगाव – १४६८.६९, ४. अमळनेर न.पा. – ५२८.६३, ५. भुसावळ न.पा. – ४९०.८४, ६. औष्णिक विद्युत केंद्र दीपनगर (टप्पा-३) – ३४७.५०, ७. विंध्य पेपर मिल दुखेडे – ३४७.००, ८. मलकापूर न.पा. – ३२४.३७, ९. धरणगाव न.पा. – २४३.३५, १०. जामनेर न.पा. – २३४.१४, ११. एम.आय.डी.सी. मलकापूर – २०५.४८, १२. औष्णिक विद्युत केंद्र दीपनगर (टप्पा-१) – २०३.२२, १३. फैजपूर वाढीव पा.पु.यो. – १५१.९८, १४. चोपडा सहसाखर कारखाना, चोपडा – १३०.७७, १५. पाचोरा न.पा. – १२४.८७, १६. यावल न.पा. – ७७.८५, १७. चोपडा न.पा. – ७२.४३, १८. शेंदुर्णी नगरपंचायत शेंदुर्णी – ६४.३६, १९. रावेर न.पा. – ५६.२०, २०. सावदा वाढीव पा.पु.यो. – ४४.५८, २१. मधुकर सहसाखर कारखाना, फैजपूर – ४०.५३, २२. आर.पी.डी. भुसावळ – २४.३३.
