जळगावमधील दुर्दैवी घटना
जळगाव (प्रतिनिधी):- शहरातील नयनतारा गेस्ट हाऊस शेजारी असलेल्या मनोहर व्हिला बंगल्यात पाण्याची टाकी साफ करत असताना, दुसऱ्या मजल्यावरून पडून एका ४२ वर्षीय कामगाराचा जागीच मृत्यू झाल्याची हृदयद्रावक घटना घडली आहे. विठ्ठल चौधरी (वय ४२, रा. पिंप्री, ता. धरणगाव) असे मृत व्यक्तीचे नाव आहे.
विठ्ठल चौधरी हे शहरातील एका नामांकित कापड दुकानात गेल्या अनेक वर्षांपासून कामाला होते. शुक्रवारी ६ मार्च रोजी सायंकाळी दुकान मालकाने त्यांना मनोहर व्हिला बंगल्याची साफसफाई करण्यासाठी पाठवले होते. बंगल्याच्या दुसऱ्या मजल्यावर असलेल्या पाण्याची टाकी स्वच्छ करत असताना विठ्ठल यांचा अचानक तोल गेला आणि ते खाली कोसळले. या भीषण अपघातात त्यांच्या डोक्याला गंभीर दुखापत झाल्याने त्यांचा जागीच मृत्यू झाला.
घटनेची माहिती मिळताच त्यांना तातडीने शासकीय वैद्यकीय महाविद्यालय व रुग्णालयात दाखल करण्यात आले, मात्र डॉक्टरांनी त्यांना तपासून मृत घोषित केले. विठ्ठल चौधरी हे कुटुंबातील एकमेव कमावते व्यक्ती होते. त्यांच्या पश्चात आई, पत्नी, दोन मुली आणि एक मुलगा असा परिवार आहे. घरातील कर्ता पुरुष गेल्यामुळे चौधरी कुटुंबावर दुःखाचा डोंगर कोसळला आहे.
याप्रकरणी रामानंद नगर पोलीस ठाण्यात अकस्मात मृत्यूची नोंद करण्यात आली आहे. पोलीस या घटनेचा पुढील तपास करत आहेत.
