शिवसेनेचा कंत्राटदाराला ‘दणका’, आंदोलनाचा इशारा!
जळगाव ( प्रतिनिधी ) – येथील शासकीय आयुर्वेद महाविद्यालय आणि रुग्णालयातील कंत्राटी कर्मचाऱ्यांवर गेल्या तीन महिन्यांपासून उपासमारीची वेळ आली आहे. ‘स्मार्ट सर्व्हिसेस, पुणे’ या कंपनीने कर्मचाऱ्यांचे वेतन रोखल्याने संताप व्यक्त होत असून, आता या प्रकरणात शिवसेनेने (उद्धव बाळासाहेब ठाकरे) आक्रमक उडी घेतली आहे. दोन दिवसांत पगार न झाल्यास ‘शिवसेना स्टाईल’ने धडा शिकवण्याचा इशारा जिल्हा संघटक गजानन मालपुरे यांनी दिला आहे.
रुग्णालयातील वर्ग ३ (लिपिक) आणि वर्ग ४ च्या शेकडो कर्मचाऱ्यांचे मानधन मागील २ ते ३ महिन्यांपासून रखडले आहे. शासनाकडून निधी प्राप्त झाला नसल्याचे कारण कंपनीकडून दिले जात आहे. नियमानुसार, शासनाचा निधी मिळो वा न मिळो, कंत्राटदाराने स्वबळावर कर्मचाऱ्यांचे वेतन वेळेवर करणे बंधनकारक असते. मात्र, मंत्र्यांशी संबंधित कंपनी असल्याने प्रशासन याकडे दुर्लक्ष करत असल्याचा आरोप होत आहे.
शिवसेनेचा आक्रमक पवित्रा
कर्मचाऱ्यांच्या या व्यथा जाणून घेतल्यानंतर गजानन मालपुरे यांच्या नेतृत्वाखाली जिल्हाधिकाऱ्यांना निवेदन देण्यात आले. यावेळी मालपुरे यांनी प्रशासनाला खडे बोल सुनावले. “कोणीही मंत्री असो किंवा बडा प्रस्थ, गरिबांच्या घामाचा पैसा अडवून धरणाऱ्यांना शिवसेना सोडणार नाही. रुग्णसेवा देणाऱ्या कर्मचाऱ्यांची मुले उपाशी राहत असतील, तर आम्ही शांत बसणार नाही.” पगार नसल्यामुळे कर्मचाऱ्यांचे दैनंदिन जीवन विस्कळीत झाले आहे.
दोन दिवसांच्या अल्टिमेटममध्ये पगार न झाल्यास, पुण्यातील मुख्य कार्यालयावर आणि स्थानिक प्रशासनावर तीव्र आंदोलन छेडण्याचा निर्धार शिवसेनेने व्यक्त केला आहे. आता जिल्हाधिकारी यावर काय ठोस कारवाई करतात, याकडे सर्वांचे लक्ष लागले आहे.
