खंडेराव नगरात रेल्वे पुलावर आढळलेल्या मृतदेहाची गूढ उकलले
जळगाव ( प्रतिनिधी ) – शहरातील खंडेराव नगर परिसरातील रेल्वे रुळाजवळ आढळलेल्या मृतदेहाचे गूढ आता उकलले आहे. सदर प्रौढाचा खून हा किरकोळ कारणावरून दोन संशयित आरोपींनी खून केल्याचे तपासात समोर आले आहे. याप्रकरणी दोघांना ताब्यात घेण्यात आले असून त्यांच्यावर गुन्हा दाखल करण्याची प्रक्रिया सुरू आहे.
अमर वसंत सपकाळे (वय ४४, रा.खंडेराव नगर) असे मयत व्यक्तीचे नाव आहे. इस्त्री काम करून परिवाराचे ते उदरनिर्वाह करीत होते. रविवारी सकाळी त्यांचा मृतदेह रेल्वे रुळाजवळ आढळून आला होता. पोलिसांनी केलेल्या तपासामध्ये सदर व्यक्तीचा खून झाल्याचे आता निष्पन्न झाले आहे. त्यानुसार रामानंदनगर पोलिसांनी तपास चक्र फिरवून दोन संशयित आरोपींना ताब्यात घेतले आहे.
संशयित आरोपींनी पोलिसांच्या चौकशीत गुन्हा कबूल केल्याची माहिती मिळाली आहे. त्यांनी दिलेल्या माहितीनुसार, शनिवारी १४ फेब्रुवारी रोजी रात्री १० ते साडेदहा वाजेच्या सुमारास अमर सपकाळे हे रेल्वे रुळाजवळ दारूच्या नशेमध्ये फिरत होते. त्यावेळेला दोन्ही संशयित आरोपी तेथे सिगारेट पीत असताना त्यांना अमर सपकाळे यांनी विनाकारण शिवीगाळ केली याबाबत संशयित आरोपींना राग आला. त्यांनी अमर सपकाळे यांचा डोक्यात दगड घालून तिथेच खून केला. यानंतर दोन्ही संशयित आरोपी तेथून फरार झाले.
दुसरीकडे सकाळी मृतदेह सापडल्यानंतर रामानंदनगर पोलिसांनी तपासाला सुरुवात केली. मिळालेल्या प्राथमिक माहितीनुसार त्यांनी पुरावे गोळा करायला सुरुवात केली.यानंतर मात्र गोपनीय माहितीच्या आधारावर त्यांनी दोन संशयित आरोपींना ताब्यात घेतले. यातील एक आरोपी सज्ञान असून दुसरा अल्पवयीन आहे. हा अल्पवयीन आरोपी रेकॉर्डवरील गुन्हेगार आहे. त्याच्यावर यापूर्वी देखील चोरी आणि प्राणघातक हल्ल्याचे गुन्हे दाखल आहेत. दोघांची कसून चौकशी केली असता त्यांनी गुन्ह्याची कबुली दिली आहे. रामानंदनगर पोलीस स्टेशनला डीवायएसपी नितीन गणापुरे यांनी भेट देऊन माहिती जाणून घेतली. या गुन्हयाचा तपास पोलीस निरीक्षक राजेंद्र गुंजाळ, यांच्या मार्गदर्शनाखाली, पीएसआय सचिन रणशिवरे , पोलीस हे्.काॅ. जितेंद्र राजपूत, जितेंद्र राठोड, सुशील चौधरी, अजित पाटील, निलेश पाटील, पोलीस नाईक योगेश बारी,पोलीस शिपाई अजय सपकाळे यांनी लावला गुन्ह्याचा छडा.
