चाळीसगाव शहरात शास्त्रीनगर येथील घटना
चाळीसगाव (प्रतिनिधी):- चाळीसगाव शहरातील शास्त्री नगर, खरजई नाका परिसरात एका डॉक्टरच्या बंद घराचे कुलूप तोडून अज्ञात चोरट्यांनी सुमारे ९८,९८३ रुपयांचे सोन्याचे दागिने आणि रोख रक्कम चोरून नेल्याची घटना घडली आहे. याप्रकरणी चाळीसगाव शहर पोलीस ठाण्यात गुन्हा दाखल करण्यात आला आहे.
फिर्यादी डॉ. विनोद रघुनाथ अमृतकर (वय ४२) हे शास्त्री नगर भागात राहतात. १३ फेब्रुवारी २०२६ रोजी रात्री ८ वाजेच्या सुमारास ते घराबाहेर गेले असताना, मध्यरात्री १:४३ ते २:०८ वाजेच्या दरम्यान अज्ञात चोरट्याने त्यांच्या बंद घराचे कुलूप तोडून आत प्रवेश केला. चोरट्याने बेडरुममधील लाकडी कपाटात ठेवलेले सोन्याचे दागिने आणि रोख रकमेवर डल्ला मारला. यामध्ये एकूण ९८,९८३ रुपयांचा मुद्देमाल चोरट्यांनी लांबवला आहे.
डॉ. अमृतकर यांच्या फिर्यादीवरून चाळीसगाव शहर पोलीस ठाण्यात गुन्हा दाखल करण्यात आला आहे. शहरात भरवस्तीत झालेल्या या चोरीमुळे नागरिकांमध्ये भीतीचे वातावरण आहे. पोलीस निरीक्षक अमितकुमार मनवरे यांच्या मार्गदर्शनाखाली श्रेणी पोलीस उपनिरीक्षक अरुण बाविस्कर या प्रकरणाचा पुढील तपास करत आहेत. अद्याप कोणालाही अटक करण्यात आलेली नाही.
