जळगाव महापालिकेचा मोठा निर्णय
जळगाव प्रतिनिधी : शहरात भटक्या श्वानांमुळे होणारा उपद्रव कमी करण्यासाठी आणि प्राणी कल्याणाचे नियम पाळण्यासाठी जळगाव शहर महानगरपालिकेच्या स्वच्छता विभागाने एक महत्त्वपूर्ण पाऊल उचलले आहे. ‘प्राणी जन्म नियंत्रण नियम, २०२३’ आणि सर्वोच्च न्यायालयाच्या निर्देशानुसार, महापालिकेने शहरात प्रभागनिहाय ‘श्वान फीडिंग झोन’ (खाद्य केंद्र) प्रस्तावित केले असून श्वानप्रेमींसाठी कडक मार्गदर्शक सूचना जाहीर केल्या आहेत.
प्रस्तावित फीडिंग झोनची ठिकाणे
महापालिकेने विविध प्रभागांत श्वानांना अन्न देण्यासाठी जागा निश्चित केल्या आहेत.
प्रभाग समिती १: संरक्षण गो सेवा संस्था (शिवाजीनगर) आणि रेल्वे लाईन लगत (शिवाजीनगर पुलाखाली).
प्रभाग समिती २: सागरनगर पाण्याची टाकी आणि नॅशनल हायवे नं. ६ वरील ST क्वार्टरच्या मागे.
प्रभाग समिती ३: मेहरूण तलाव (श्रीकृष्ण लॉन्स लगत) आणि शिवाजी उद्यान (TBS सेंटर).
प्रभाग समिती ४: खंडेरावनगर पाण्याची टाकी आणि समतानगर (पठाण बाबा दर्ग्याजवळ).
श्वानप्रेमी आणि नागरिकांसाठी महत्त्वाच्या सूचना
रस्त्यावरील श्वानांना अन्न देणाऱ्या नागरिकांनी नियमांचे पालन करणे बंधनकारक आहे सार्वजनिक रस्ते, पादचारी मार्ग, घरांच्या अगदी जवळ किंवा लहान मुलांच्या खेळण्याच्या ठिकाणी श्वानांना अन्न देऊ नये. अन्न दिल्यानंतर त्या ठिकाणी कचरा किंवा अस्वच्छता होणार नाही याची खात्री करावी. वाहतूक आणि मानवी हालचाल कमी असताना, म्हणजेच उशिरा रात्री किंवा पहाटे श्वानांना अन्न देणे योग्य राहील. श्वानांना कच्चे मांस देऊ नये. तसेच दोन वेगवेगळ्या श्वानांच्या टोळ्यांना एकाच वेळी अन्न देणे टाळावे.
हरकती व तक्रारींसाठी आवाहन
या प्रस्तावित जागांबाबत नागरिकांच्या काही हरकती किंवा सूचना असल्यास त्यांनी १७ मजली प्रशासकीय इमारतीमधील ८ व्या मजल्यावर (आरोग्य विभाग) लेखी स्वरूपात कळवावे. तसेच भटक्या श्वानांच्या तक्रारीसाठी महापालिकेने ८८५५७३५७४४ हा हेल्पलाईन क्रमांक जाहीर केला आहे.
“रस्त्यावरील श्वानांना अन्न देणे हा दंडनीय गुन्हा असल्याचे भारतीय प्राणी कल्याण मंडळाने नमूद केले आहे. त्यामुळे शिस्त लावण्यासाठी हे फीडिंग झोन तयार करण्यात येत आहेत.” — आयुक्त, जळगाव शहर महानगरपालिका.
