जळगाव महापालिकेवर महायुतीचा भगवा !
जळगाव प्रतिनिधी : जळगाव शहर महानगरपालिकेच्या महापौर आणि उपमहापौर पदाची निवड प्रक्रिया आज शुक्रवारी ६ फेब्रुवारी रोजी अत्यंत उत्साहात पार पडली. अपेक्षेप्रमाणे, एकमेव अर्ज आलेल्या महायुतीच्या दीपमाला काळे यांची महापौरपदी, तर मनोज सुरेश चौधरी यांची उपमहापौरपदी बिनविरोध निवड झाल्याची अधिकृत घोषणा करण्यात आली.
शुक्रवार ६ फेब्रुवारी रोजी सकाळी ११ वाजता महानगरपालिकेच्या सभागृहात विशेष सभेचे आयोजन करण्यात आले होते. पीठासीन अधिकारी तथा जिल्हाधिकारी रोहन घुगे यांनी निवडणूक प्रक्रियेला सुरुवात केली. महापौरपदासाठी दीपमाला काळे यांचा आणि उपमहापौर पदासाठी मनोज चौधरी यांचा प्रत्येकी एकच अर्ज प्राप्त झाला होता. इतर कोणत्याही पक्षाकडून किंवा अपक्ष उमेदवाराकडून अर्ज दाखल न झाल्याने, जिल्हाधिकाऱ्यांनी या दोन्ही निवडी बिनविरोध झाल्याचे जाहीर केले.
निवडीची घोषणा होताच महानगरपालिका सभागृहात भाजप, शिवसेना आणि राष्ट्रवादी काँग्रेसच्या (महायुती) कार्यकर्त्यांनी घोषणाबाजी करत एकच जल्लोष केला. विजयाचा आनंद साजरा करण्यासाठी महापालिका इमारतीपासून भव्य विजय रॅली काढण्यात आली. या आनंदाच्या क्षणी महापौर दीपमाला काळे यांचे संपूर्ण कुटुंब आणि उपमहापौर मनोज चौधरी यांचे कुटुंबीय रॅलीत सहभागी झाले होते.
ढोल-ताशांच्या गजरात आणि गुलालाच्या उधळणीत कार्यकर्त्यांनी जळगाव शहर डोक्यावर घेतले होते. मंत्री गिरीश महाजन आणि पालकमंत्री गुलाबराव पाटील यांनी आधीच सूचित केल्याप्रमाणे, आता नवीन नेतृत्वाखाली जळगाव शहराच्या रखडलेल्या विकासकामांना वेग मिळेल, अशी अपेक्षा व्यक्त केली जात आहे. आमदारांच्या उपस्थितीत पार पडलेल्या या प्रक्रियेनंतर आता शहराच्या राजकारणात महायुतीची पकड अधिक घट्ट झाली आहे. यावेळी जळगाव शहराचे आमदार राजू मामा भोळे, जिल्हा परिषदेचे माजी सदस्य प्रताप गुलाबराव पाटील यांनी नवनिर्वाचित महापौर व उपमहापौर यांना शुभेच्छा दिल्या
