मेळाव्यात दिल्या 60 नवीन वीजजोडण्या
कार्यक्रमास महावितरणच्या जळगाव परिमंडलाचे मुख्य अभियंता इब्राहिम मुलाणी प्रमुख अतिथी म्हणून उपस्थित होते. धुळे मंडलाचे अधीक्षक अभियंता सायस दराडे, धुळे ग्रामीण विभागाचे कार्यकारी अभियंता प्रीतम काळे, दरेगावच्या सरपंच जयंतीताई भोये यांची यावेळी उपस्थिती होती. यावेळी मुख्य अभियंता इब्राहिम मुलाणी म्हणाले की, स्मार्ट योजनेनुसार दारिद्र्यरेषेखालील ग्राहकांना एक किलोवॅटचा सौर ऊर्जानिर्मिती प्रकल्प बसविण्यासाठी केंद्र सरकारकडून 30 हजार रुपये तर राज्य सरकारकडून 17,500 रुपये अनुदान मिळेल. सौर ऊर्जा प्रकल्पाची ऊर्वरित रक्कम भरून ग्राहक 25 वर्षे मोफत विजेचा लाभ घेऊ शकतो. 100 युनिटपेक्षा कमी वीजवापर असणाऱ्या आर्थिकदृष्ट्या दुर्बल ग्राहकांनाही योजनेचा लाभ होणार आहे. केंद्र सरकारच्या 30 हजार रुपये अनुदानाखेरीज राज्य सरकारकडून 10 हजार रुपये (सर्वसाधारण ग्राहक) तसेच 15 हजार रुपये (अनुसूचित जाती व अनुसूचित जमाती) अनुदान देण्यात येणार आहे. एक किलोवॅटच्या सौर ऊर्जा निर्मिती प्रकल्पातून दरमहा सुमारे 120 युनिट वीजनिर्मिती होते. त्यामुळे 100 युनिटपर्यंत वीज वापरणाऱ्या ग्राहकांना स्वतःची गरज भागवून अतिरिक्त वीज महावितरणला विकता येते. या प्रकल्पातून 25 वर्षे वीजनिर्मिती होत असल्याने तेवढा काळ लाभ होतो. त्यामुळे जास्तीत जास्त पात्र ग्राहकांनी या योजनेचा लाभ घेऊन विजेबाबत स्वयंपूर्ण व्हावे आणि वीजबिलावरील खर्च वाचवावा, असे आवाहन मुख्य अभियंता मुलाणी यांनी केले.
कार्यक्रमाच्या आयोजनासाठी पिंपळनेर उपविभागाचे उपकार्यकारी अभियंता योगेश काळे यांच्यासह कुडाशी कक्ष अभियंता व वीज कर्मचाऱ्यांनी परिश्रम घेतले. कार्यक्रमास गावकऱ्यांनी मोठ्या संख्येने उपस्थिती लावून योजनेचा लाभ घेण्यास औत्सुक्य दाखवले.
कॅप्शन : महावितरणतर्फे दरेगाव आंबापाडा येथे आयोजित मेळाव्यात बोलताना जळगाव परिमंडलाचे मुख्य अभियंता इब्राहिम मुलाणी. सोबत अधीक्षक अभियंता सायस दराडे, कार्यकारी अभियंता प्रीतम काळे, सरपंच जयंतीताई भोये आदी.
