जळगाव तालुक्यात जळके येथे कर्जदारावर गुन्हा दाखल
जळगाव (प्रतिनिधी):- बँकेचे कर्ज न फेडल्यामुळे कायदेशीररीत्या जप्त करण्यात आलेले घर, बँकेचे सील तोडून पुन्हा अनधिकृतपणे ताब्यात घेतल्याचा धक्कादायक प्रकार जळगाव तालुक्यातील जळके येथे उघडकीस आला आहे. या प्रकरणी जळगाव एमआयडीसी पोलीस स्टेशनमध्ये संशयित आरोपीविरुद्ध भारतीय न्याय संहितेच्या विविध कलमान्वये गुन्हा दाखल करण्यात आला आहे.
जळके येथील रहिवासी प्रशांत नाना पाटील यांनी २०१८ मध्ये स्टेट बँक ऑफ इंडियाकडून आपल्या राहत्या घरावर १० लाख रुपयांचे गृहकर्ज घेतले होते. मात्र, दीर्घकाळ उलटूनही त्यांनी कर्जाची परतफेड केली नाही. बँकेने वारंवार नोटिसा बजावूनही प्रतिसाद न मिळाल्याने, अखेर महसूल विभागाच्या मदतीने या मालमत्तेवर जप्तीची कारवाई करण्यात आली होती. नायब तहसीलदार डी. बी. जाधव यांनी कायदेशीर प्रक्रिया पूर्ण करून घराचा ताबा बँकेकडे सोपवला होता आणि बँकेने घराला आपले अधिकृत सील व नोटीस लावली होती.
असा उघड झाला प्रकार
२१ जानेवारी २०२६ रोजी जळके शाखेचे बँक मॅनेजर मृणाल गजानन सुकदेवे हे जप्त केलेल्या मालमत्तेची पाहणी करण्यासाठी गेले असता, त्यांना धक्कादायक दृश्य दिसले. संशयित प्रशांत पाटील यांनी बँकेची कोणतीही परवानगी न घेता घराचे सील तोडले होते आणि लावलेली नोटीस फाडून टाकली होती. इतकेच नव्हे तर, संपूर्ण कुटुंबासह त्यांनी घरात अनधिकृतपणे प्रवेश करून पुन्हा वास्तव्य सुरू केले होते.
पोलिसांत गुन्हा दाखल
बँकेच्या कामात अडथळा आणून सरकारी प्रक्रियेद्वारे जप्त केलेली मालमत्ता बेकायदेशीरपणे बळकावल्याप्रकरणी स्टेट बँक ऑफ इंडियाचे अधिकृत अधिकारी कृष्णकुमार विनायकराव डेकाटे (वय ४८) यांनी तक्रार दिली. या तक्रारीवरून जळगाव एमआयडीसी पोलीस स्टेशनमध्ये प्रशांत नाना पाटील यांच्याविरुद्ध गुन्हा नोंदवण्यात आला आहे. या प्रकरणाचा पुढील तपास पोलीस निरीक्षक बबन आव्हाड यांच्या मार्गदर्शनाखाली पोलीस हेड कॉन्स्टेबल ईश्वर लोखंडे करत आहेत.
