एमआयडीसी पोलिसांची कारवाई
जळगाव (प्रतिनिधी) : येथील काशिनाथ चौफुली परिसरातील ओला इलेक्ट्रिक सर्व्हिस सेंटरच्या समोरून ५७ हजार रुपये किमतीचे साहित्य चोरणाऱ्या दोघांना एम.आय.डी.सी. पोलिसांनी अटक केली आहे. या कारवाईमुळे परिसरात खळबळ उडाली असून चोरी गेलेला मुद्देमाल हस्तगत करण्यात आला आहे.
काशिनाथ चौफुली परिसरात ओला इलेक्ट्रिकचे सर्व्हिस सेंटर आहे. या सेंटरच्या समोरील मोकळ्या जागेत ओला कंपनीची ३ KV क्षमतेची बॅटरी (किंमत ४४ हजार रुपये) आणि MCU असेंब्ली (किंमत १३ हजार रुपये) ठेवलेली होती. दि. ११ जानेवारी रोजी संध्याकाळी ७ ते १२ जानेवारी रोजी सकाळी ९.३० च्या दरम्यान अज्ञात चोरट्यांनी हे ५७ हजार रुपये किमतीचे साहित्य चोरून नेले होते.
याप्रकरणी ओला ई-मॅनेजर निलेश संतोष कोळी (वय ३०, रा. जळगाव) यांनी फिर्याद दिली होती. एम.आय.डी.सी. पोलिसांनी तातडीने तपास चक्रे फिरवून अफझल अली शब्बीर नगरी (वय २८, रा. शिवाजी नगर, जळगाव) आणि त्याच्यासोबत असलेल्या एका साथीदाराला २० रोजी रात्री अटक केली. ही कारवाई ग्रेड उपनिरीक्षक संजय पाटील आणि त्यांच्या पथकाने केली. या गुन्ह्याचा पुढील तपास पोलीस हेड कॉन्स्टेबल गिरीश पाटील हे करत आहेत. अटक केलेल्या आरोपींकडून आणखी काही गुन्हे उघडकीस येण्याची शक्यता पोलिसांनी वर्तवली आहे.
