जळगाव महापालिका निवडणूक
मतदारांना पैशांचे आमिष दाखवल्याप्रकरणी उमेदवारावर अदखलपात्र गुन्हा दाखल
जळगाव प्रतिनिधी : जळगाव महानगरपालिका निवडणुकीच्या रणधुमाळीत आचारसंहिता भंगाचा मोठा प्रकार समोर आला आहे. कोल्हे नगर परिसरात मतदारांना पैशांचे आमिष दाखवून लाच देण्याचा प्रयत्न केल्याप्रकरणी जळगाव शहर महानगरपालिकेचे उमेदवार संतोष मोतीराम पाटील यांच्याविरोधात रामानंदनगर पोलीस ठाण्यात अदखलपात्र गुन्हा नोंदवण्यात आला आहे.
जळगाव महानगरपालिकेच्या निवडणूक कक्षाला या संदर्भात एक तक्रार प्राप्त झाली होती. हरिविठ्ठल नगर येथील रहिवासी कैलास बुधा पाटील (हटकर) यांनी १३ जानेवारी २०२६ रोजी निवडणूक कक्षाकडे लेखी तक्रार केली होती. या तक्रारीनुसार, १२ जानेवारी रोजी कोल्हे नगर परिसरात उमेदवार संतोष पाटील यांनी निवडणुकीत स्वतःच्या फायद्यासाठी मतदारांना भ्रष्ट मार्गाने पैशांचे आमिष दाखवले आणि लाच दिली.
या तक्रारीची दखल घेत जळगाव महानगरपालिकेच्या निवडणूक कक्षाने चौकशी केली. त्यानंतर, जळगाव महापालिकेचे भरारी (Flying Squad Team) पथक प्रमुख अभिषेक विनायक सूर्यवंशी यांनी रामानंदनगर पोलीस ठाण्यात अधिकृत फिर्याद दिली. या फिर्यादीवरून पोलिसांनीप्रभाग ११ ब चे शिवसेनाचे उमेदवार संतोष मोतीराम पाटील यांच्यावर अदखलपात्र गुन्हा दाखल केला आहे.
