जळगाव तालुक्यात मकर संक्रांतीच्या दिवशी भोलाणे हादरले
जळगाव (प्रतिनिधी) : बुधवारी मकर संक्रांत सण उत्साहात साजरा होत असतानाच तालुक्यातील भोलाणे येथे एक धक्कादायक घटना घडली आहे. मकर संक्रांतीच्या दिवशी बुधवारी १४ जानेवारी रोजी दुपारी जुन्या वादातून बाळकृष्ण सदाशिव कोळी (वय ४५) यांची चॉपरने वार करून निर्घृण हत्या करण्यात आली. या हल्ल्यात बाळकृष्ण यांचा लहान मुलगा देखील जखमी झाला आहे.
बाळकृष्ण सदाशिव कोळी (वय ४५, रा. भोलाणे ता. जळगाव) असे मयत इसमाचे नाव आहे.बाळकृष्ण कोळी आणि संशयित आरोपी आकाश रामकृष्ण कोळी यांच्यात जुना वाद होता. बुधवारी मकर संक्रांतीच्या दिवशी भोलाणे येथील बस स्टँड परिसरात हा वाद पुन्हा उफाळून आला. रागाच्या भरात आकाश कोळी याने बाळकृष्ण यांच्यावर चॉपरने हल्ला चढवला. बाळकृष्ण यांच्यावर वर्मी तीन वार करण्यात आल्याने त्यांचा जागीच मृत्यू झाला. हल्ला होत असताना बाळकृष्ण यांचा लहान मुलगा आपल्या वडिलांना वाचवण्यासाठी मध्ये धावला. यावेळी हल्लेखोराच्या चॉपरचा वार मुलाच्या हाताला लागल्याने तो जखमी झाला आहे.
सणासुदीच्या दिवशी भररस्त्यात घडलेल्या या घटनेमुळे गावात प्रचंड खळबळ उडाली आहे. मयत बाळकृष्ण यांच्या नातेवाईकांनी दिलेल्या माहितीनुसार, मुख्य संशयित आकाश कोळी याच्यासोबत त्याचे वडील रामकृष्ण ताराचंद कोळी आणि काका प्रकाश ताराचंद कोळी हे देखील घटनास्थळी उपस्थित होते. या सर्वांच्या उपस्थितीत हा थरार घडल्याचे सांगण्यात येत आहे.
बाळकृष्ण कोळी हे भोलाणे गावात मजुरी करून आपल्या कुटुंबाचा उदरनिर्वाह करत होते. त्यांच्या निधनामुळे कुटुंबावर दुःखाचा डोंगर कोसळला आहे. त्यांच्या पश्चात वृद्ध आई-वडील, भाऊ, पत्नी आणि जयेश व विशाल ही दोन मुले असा परिवार आहे. या प्रकरणी मयत बाळकृष्ण यांचे भाऊ नरेंद्र सदाशिव कोळी यांनी दिलेल्या फिर्यादीवरून जळगाव तालुका पोलीस स्टेशनमध्ये गुन्हा दाखल करण्याची प्रक्रिया रात्री उशिरापर्यंत सुरू होती. पोलीस आरोपींच्या शोधासाठी पथके रवाना करत असून पुढील तपास करत आहेत.
