जळगाव महापालिकेत महायुतीच्या विजयी उमेदवारांची संख्या झाली ६
जळगाव ( प्रतिनिधी ) – जळगाव शहर महानगरपालिकेच्या निवडणुकीमध्ये आता महायुतीच्या बिनविरोध नगरसेवकांची संख्या आता ८ वर पोहोचली आहे. शहराचे आ. राजूमामा भोळे यांच्या प्रभागातील दुसरी जागा ७ अ मधील दीपमाला मनोज काळे आणि प्रभाग क्रमांक दोन येथील २ अ मधील सागर श्याम सोनवणे हे बिनविरोध निश्चित झाले आहेत. दीपमाला काळे यांच्या विरोधातील शिवसेना ठाकरे गटाच्या उमेदवारांनी व सागर सोनवणे यांच्या विरोधात अपक्ष उमेदवारांनी माघार घेतल्यामुळे आता ही निवड निश्चित झाली आहे.
आतापर्यंत भारतीय जनता पार्टीचे ३ व शिवसेनेचे ५ असे एकूण ८ उमेदवार महायुतीचे बिनविरोध निवडून आले आहेत. यामध्ये भाजपच्या गायत्री बेंडाळे यांनी १२ ब मधून विजयाचा श्री गणेशा केल्यानंतर गुरुवारी माघारीच्या पहिल्या दिवशी शिवसेनेचे मनोज सुरेश चौधरी, प्रतिभा गजानन देशमुख आणि डॉ. गौरव चंद्रकांत सोनवणे हे बिनविरोध निश्चित झाले. यानंतर शुक्रवार दि. २ जानेवारी रोजी माघारीच्या दुसऱ्या व अंतिम दिवशी सकाळी राष्ट्रवादी काँग्रेस पार्टी शरद पवार गटाचे उमेदवार सरला सुनील सोनवणे यांनी आपला अर्ज माघारी घेतला. त्यामुळे शिवसेनेचे रेखा चुडामण पाटील हे बिनविरोध निश्चित झाले आहेत.
नंतर दुपारी दीड वाजेच्या सुमारास प्रभाग क्रमांक ७ क मध्ये शेवटच्या अपक्ष उमेदवाराने माघार घेतल्यानंतर आमदार राजूमामा भोळे यांचे सुपुत्र विशाल सुरेश भोळे यांचा विजय निश्चित झाला आहे. प्रभाग क्रमांक ७ अ मध्ये भाजपच्या दीपमाला मनोज काळे यांच्या विरोधात शिवसेना ठाकरे गटाच्या जयश्री भिकन हिवराळे यांनी दुपारी माघार घेताच बिनविरोध निवडीचे चित्र निश्चित झाले. यानंतर प्रभाग २ अ मध्ये शिवसेनेचे सागर श्याम सोनवणे यांच्या विरोधात छाननीअंती ५ अपक्ष उमेदवारांनी माघार घेतली.
त्यात अक्षय छत्रभुज सोनवणे, अश्विन साहेबराव सैंदाणे, शमकांत बळीराम सोनवणे, कांचन विकास सोनवणे, ईश्वरी दिलीप ठाकूर या ५ उमेदवारांनी माघार घेतली. यानंतर सागर श्याम सोनवणे यांचा विजयाचा मार्ग सुकर झाला. भाजप व शिवसेना समर्थकांनी महापालिकेच्या बाहेर जल्लोष साजरा करत महायुतीच्या एकजूटीचा विजय असल्याचे सांगितले.
