तालुका पोलिसात गुन्हा दाखल
जळगाव प्रतिनिधी तालुक्यातील नारायण नगर परिसरात नातीच्या लग्नासाठी कष्टाने जमवलेली रोकड आणि दागिने चोरट्यांनी लंपास करत वृद्ध आजीच्या आनंदावर पाणी फेरल्याची घटना २५ ते २६ नोव्हेंबरच्या मध्यरात्री उघडकीस आली. सुमन दयाराम सपकाळे (वय ७०) या आपल्या मुलगा, सून आणि नातवंडांसह राहतात. मुलगा जितेंद्र सपकाळे हे खासगी वाहनावर चालक म्हणून काम करतात. त्यांच्या मुलीच्या लग्नासाठी सुमन सपकाळे यांनी दीर्घकाळ बचत करून ६० हजारांची रोकड, काही सोन्याचे दागिने आणि चांदीचे दागिने बाजूला काढून ठेवले होते.
रात्रीचा फायदा घेत चोरट्यांनी घराच्या मागील दरवाजाचे कुलूप तोडून आत प्रवेश केला आणि लोखंडी पेटीत ठेवलेली ६० हजारांची रोकड, १ ग्रॅम वजनाचे तीन जोड कानातले, २ ग्रॅमचे मनी मंगळसूत्र आणि १० भार वजनाचे मुलांच्या हातातील चांदीचे कळे असे एकूण ९२ हजार रुपये किंमतीचा ऐवज चोरून नेला.
सकाळी पहाटे घरातील अस्ताव्यस्त अवस्थेमुळे चोरीचे लक्षात येताच सपकाळे कुटुंबीयांनी तत्काळ तालुका पोलिस ठाण्यात धाव घेत तक्रार दिली. पोलिसांनी अज्ञात आरोपीविरुद्ध गुन्हा दाखल करून तपास सुरू केला असून पुढील तपास पोना विजय निकम हे करीत आहेत.
