जळगाव शहरात सुप्रीम कॉलनी चौकात आज सकाळची घटना
जळगाव प्रतिनिधी शहरातील सुप्रीम कॉलनी चौकामध्ये एमआयडीसी परिसरातून जळगाव शहरात मावशीच्या घरी परत असताना अज्ञात भरधाव वाहनाने दिलेल्या धडकेत दुचाकीवरील तरुणाचा उपचारादरम्यान मृत्यू झाला. ही घटना आज मंगळवार दि. २३ सप्टेंबर रोजी सकाळी १० वाजेच्या सुमारास घडली. या प्रकरणी एमआयडीसी पोलीस स्टेशनला गुन्हा दाखल करण्यात आला आहे.
प्रेम उर्फ जयपाल चरणसिंग पाटील (वय १८, रा. लोंढरी ता.जामनेर, हल्ली मु. एमआयडीसी परिसर, जळगाव) असे मयत तरुणाचे नाव आहे. जयपाल याच्या पश्चात आई, वडील, बहिण असा परिवार आहे.(केसीएन)जयपाल याने नुकतेच बारावीचे शिक्षण घेतले होते. तर त्याचे वडील चरणसिंग पाटील हे छत्रपती संभाजीनगर जिल्ह्यात वाळूज भागात एमआयडीसी येथे कामगार म्हणून काम करीत आहेत. दरम्यान मंगळवार दि. २३ रोजी सकाळी एमआयडीसी भागातून मावशीच्या घरी परतत असताना जयपाल याच्या दुचाकीला अज्ञात भरधाव वाहनाने जबर धडक दिली.
या धडकेत जयपाल हा गंभीर जखमी झाला. त्याला शासकीय वैद्यकीय महाविद्यालय व रुग्णालयात उपचारासाठी दाखल करण्यात आले. तेथे अतिदक्षता विभागामध्ये उपचार सुरू असताना दुपारी २ वाजेच्या सुमारास त्याचा मृत्यू झाला. यावेळी जयपाल याच्या परिवाराने मन हेलावणारा आक्रोश केला. घटनेप्रकरणी एमआयडीसी पोलीस स्टेशनला गुन्हा दाखल करण्यात आला आहे.
