अमळनेर शहरातील घटना, नाशिकच्या तरुणाला अटक
अमळनेर (प्रतिनिधी) : केवळ तंबाखू न दिल्याच्या किरकोळ कारणावरून पैलाड भागात एका तरुणाचा दगडाने ठेचून खून झाल्याची धक्कादायक घटना रविवारी दि. २१ रोजी रात्री घडली. याप्रकरणी नाशिक येथील तरुणाला अटक करण्यात आली असून अमळनेर पोलीस स्टेशनला गुन्हा दाखल करण्यात आला आहे.
मृताचे नाव मुकेश भिका धनगर (३८, रा. स्वामी विवेकानंद कॉलनी, पैलाड) असे आहे. संशयित आरोपी निखिल विष्णू उतकर (४५, रा. करंजा, पंचवटी, नाशिक) याला पोलिसांनी तात्काळ अटक केली आहे. फिर्यादी दिनेश भिका धनगर याने दिलेल्या माहितीनुसार, रात्री ११ वाजताच्या सुमारास मुकेश घराबाहेर गेला असता हेडावे नाक्यावर वडाच्या झाडाखाली त्याचे आरोपीशी वाद सुरू झाले. तंबाखू दिली नाही यावरून वाद चिघळला आणि संशयित आरोपीने दगड उचलून मुकेशवर वार सुरू केले. दरम्यान, दिनेशने भांडण थांबवण्याचा प्रयत्न केला असता त्यालाही आरोपीने दगड मारल्याने तो घराकडे जाऊन मदत बोलवायला गेला. तो पुन्हा घटनास्थळी परतला असता आरोपी निखिल उतकर हा मुकेशच्या डोक्यात व तोंडावर ओबडधोबड दगडाने वार करत होता. जखमी अवस्थेत मुकेशला दवाखान्यात नेण्यात आले; परंतु डॉक्टरांनी त्याला मृत घोषित केले. या घटनेनंतर पोलिस निरीक्षक दत्तात्रय निकम व त्यांच्या पथकाने तातडीने कारवाई करत आरोपीला अटक केली. पुढील तपास पोलीस उपनिरीक्षक नामदेव बोरकर करीत आहेत. जिल्ह्यात खूनसत्र सुरुच असल्याने खळबळ उडाली आहे.
