भुसावळ तालुक्यात दीपनगर येथील घटना
भुसावळ (प्रतिनिधी) :- जुन्या महामार्गावर शुक्रवारी दि. १२ सप्टेंबर रोजी दुपारी घडलेल्या भीषण अपघातात दुचाकीने दिलेल्या धडकेत १९ वर्षीय तरुणाचा जागीच मृत्यू झाला. याबाबत भुसावळ तालुका पोलीस स्टेशनला गुन्हा दाखल करण्यात आला आहे.
हुजेब राऊत खाटीक (वय १९, रा. वरणगाव) असे मृत तरुणाचे नाव आहे. तो सहा बहिणींचा एकुलता एक भाऊ होता. या दुर्दैवी घटनेने कुटुंबावर शोककळा पसरली आहे. हुजेब नमाज पठणासाठी पायी जात असताना दिपनगर २१० गेटजवळील चिकन दुकानासमोर अपघात घडला. (एमएच १९ आर ९५२६) क्रमांकाच्या दुचाकीने त्याला जोरदार धडक दिल्याने त्याचा जागीच मृत्यू झाला. घटनेची माहिती मिळताच भुसावळ तालुका पोलिसांनी घटनास्थळी धाव घेत पंचनामा केला. मृतदेह शवविच्छेदनासाठी शासकीय ट्रॉमा सेंटरमध्ये पाठविण्यात आला असून पुढील तपास सुरू आहे. धडक देणारे दुचाकीचालक बबलू रमेश बागेश्वर (वय ५२, रा. वाघ नगर, जळगाव) व महेश विजय चौधरी (वय ४५, रा. ऑर्डनन्स फॅक्टरी, वरणगाव) यांना किरकोळ जखमा झाल्या असून पोलिसांनी ताब्यात घेतले आहे. हुजेबच्या निधनामुळे कुटुंबाचा आधारच हरपल्याची भावना ग्रामस्थांनी व्यक्त केली.घटनेबद्दल भुसावळ तालुका पोलीस स्टेशनला गुन्हा दाखल करण्यात आला आहे.
