जळगाव शहरात भुसावळ रोडवरील घटना
जळगाव (प्रतिनिधी) :- शहरापासून जवळच असलेल्या गोदावरी इंजिनिअरिंग कॉलेजजवळ शुक्रवारी पहाटे भीषण अपघातात एका भरधाव वाहनाने दुचाकीला जोरदार धडक दिल्याने कडगाव येथील एका तरुणाचा जागीच मृत्यू झाला, तर त्याचा मित्र गंभीर जखमी झाला आहे. ही घटना पहाटे आज शुक्रवारी दि. १२ रोजी साडेचार वाजण्याच्या सुमारास घडली. एमआयडीसी पोलीस ठाण्यात गुन्हा दाखल करण्यात आला आहे.
संजय पोपट पाटील (वय २७, रा. कडगाव, ता. जळगाव) असे मृत तरुणाचे नाव आहे. संजय पाटील हा आई-वडील आणि बहिणीसोबत कडगावात राहत होता. मजुरी करून कुटुंबाचा उदरनिर्वाह करत होता. दि. १२ सप्टेंबर रोजी पहाटे तो मित्र गणेश बाबुराव बाविस्कर (वय ३५, रा. कडगाव) याच्यासोबत दुचाकीवरून जळगावहून कडगावकडे निघाला होता. गोदावरी इंजिनिअरिंग कॉलेजसमोर पोहोचताच, समोरून भरधाव वेगाने आलेल्या एका अज्ञात वाहनाने त्यांच्या दुचाकीला जोरदार धडक दिली. धडक इतकी भीषण होती की, संजय पाटील यांचा जागीच मृत्यू झाला. तर त्याचा मित्र गणेश बाविस्कर गंभीर जखमी झाला.
अपघाताची माहिती मिळताच स्थानिकांनी धाव घेतली आणि जखमी गणेशला तात्काळ शासकीय वैद्यकीय महाविद्यालयात दाखल केले. या घटनेची माहिती मिळाल्यानंतर संजय पाटील यांच्या आई-वडिलांनी तात्काळ रुग्णालयात धाव घेतली. एकुलत्या एका मुलाचा मृतदेह पाहून त्यांनी केलेला आक्रोश हृदय पिळवटून टाकणारा होता. त्यांच्या नातेवाईक आणि मित्रपरिवारानेही रुग्णालयात मोठी गर्दी केली होती. संपूर्ण कुटुंब आणि गावकऱ्यांवर या घटनेमुळे शोककळा पसरली आहे. एमआयडीसी पोलीस ठाण्यात या अपघाताची नोंद करण्यात आली आहे.
