जळगाव तालुक्यातील देवगाव येथील गिरणा धरणाजवळची घटना
जळगाव ( प्रतिनिधी ) – तालुक्यातील देवगाव शिवारात गिरणा धरणाजवळ शेतात काम करत असलेल्या एका ७० वर्षीय महिलेवर बिबट्याने हल्ला केल्याची दुर्दैवी घटना घडली आहे. या हल्ल्यात गंभीर जखमी झालेली वृद्ध महिला मात्र जागीच ठार झाली आहे. घटने प्रकरणी जळगाव तालुक्यात एकच खळबळ उडाली असून जळगाव तालुका पोलीस स्टेशनला अकस्मात मृत्यूची नोंद करण्याचे काम सुरू होते.
इंदुबाई वसंत पाटील (वय ७३, रा.देवगाव)असे मृत महिलेचे नाव आहे. त्यांच्या पश्चात रवींद्र व चंद्रकांत अशी दोन मुले, एक मुलगी असा परिवार आहे. पूर्ण परिवार शेतात काम करून उदरनिर्वाह करतो.(केसीएन) सोमवार दि. ४ ऑगस्ट रोजी दुपारी १२.३० च्या सुमारास इंदुबाई पाटील या देवगाव शिवारातील त्यांच्या शेतात काम करत होत्या. त्याचवेळी एका बिबट्याने त्यांच्यावर हल्ला चढवला. बिबट्याने त्यांच्या डोक्यावर आणि चेहऱ्यावर चावा घेतल्याने त्या गंभीर जखमी झाल्या. त्यांच्या मदतीसाठी कोणीही नसल्याने त्या शेतात जखमी अवस्थेत पडून होत्या.
शेतात काम करणाऱ्या बाळू पुना पाटील आणि रमेश पौलाद सोनवणे यांना ही घटना लक्षात येताच, त्यांनी तात्काळ पोलीस पाटील यांना याबाबत माहिती दिली.(केसीएन)पोलीस पाटील यांनी घटनेची माहिती मिळताच त्यांचा चुलत भाऊ चंद्रकांत पाटील यांच्यासह घटनास्थळी धाव घेतली. घटनास्थळी बिबट्याचे पावलांचे ठसे आढळून आले आहे. त्यांनी इंदुबाई पाटील यांना जखमी अवस्थेत पाहून तातडीने पोलिसांना आणि वनविभागाला याबाबत कळविले.घटनेची माहिती मिळताच तालुका पोलीस स्टेशनचे अधिकारी व कर्मचारी आणि वनविभागाचे अधिकारी नितीन बोरकर व सहकारी घटनास्थळी दाखल झाले.
त्यांनी पंचनामा करून इंदुबाई पाटील यांना उपचारासाठी तातडीने जळगाव येथील शासकीय वैद्यकीय महाविद्यालय व रुग्णालयात दाखल केले. मात्र, डॉक्टरांनी तपासणी करून त्यांना मृत घोषित केले. (केसीएन)या घटनेमुळे देवगावसह जळगाव तालुक्यात भीतीचे वातावरण पसरले आहे. वनविभागाने तात्काळ बिबट्याचा शोध घेऊन त्याला पकडण्याची मागणी ग्रामस्थांकडून होत आहे.जळगाव तालुका पोलीस स्टेशनमध्ये या घटनेची नोंद करण्यात आली असून, पुढील तपास सुरू आहे.
