महसूल दिनी अमळनेरच्या कर्मचाऱ्यांचा सन्मान
जळगाव ( प्रतिनिधी ) – महसूल दिनाचे औचित्य साधून आज, १ ऑगस्ट रोजी जिल्ह्यातील उत्कृष्ट महसूल कर्मचाऱ्यांचा गौरव करण्यात आला. यात अमळनेर तालुक्यातील उपविभागीय अधिकारी (एसडीओ) नितीनकुमार मुंडावरे यांचे वाहन चालक ताराचंद महारू बाविस्कर यांना पालकमंत्री गुलाबराव पाटील यांच्या हस्ते ‘उत्कृष्ट वाहन चालक’ पुरस्कार प्रदान करण्यात आला.
या पुरस्कारांमध्ये अमळनेर तालुक्यातील अनेक कर्मचाऱ्यांचा समावेश आहे. नायब तहसीलदार प्रशांत धमके, उपविभागीय कार्यालयातील अव्वल कारकून अशोक ठाकरे, मंडळ अधिकारी संवर्गातून विठ्ठल पाटील आणि कोतवाल संवर्गातून मुकेश शिसोदे यांनाही उत्कृष्ट कर्मचारी म्हणून गौरवण्यात आले. तसेच, अमळनेर तालुक्यातील नगाव येथील पोलीस पाटील प्रवीण गोसावी यांनाही त्यांच्या उत्कृष्ट कामगिरीबद्दल पुरस्कार प्रदान करण्यात आला.
हा कार्यक्रम जिल्ह्याधिकारी कार्यालयात आयोजित करण्यात आला होता. यावेळी पालकमंत्री गुलाबराव पाटील, जलसंपदामंत्री गिरीश महाजन, वस्त्रोद्योग मंत्री संजय सावकारे, जिल्हाधिकारी आयुष प्रसाद, जिल्हा परिषदेच्या मुख्य कार्यकारी अधिकारी मीनल करणवाल, आ. राजूमामा भोळे, अमळनेरचे उपविभागीय अधिकारी नितीनकुमार मुंडावरे, तहसीलदार रुपेशकुमार सुराणा आणि इतर अनेक कर्मचारी उपस्थित होते.
