सुमठाणे घटनेतील महिला उंदीरखेडाची, पारोळा पोलिसांकडून एक जण ताब्यात
पारोळा (प्रतिनिधी) :- तालुक्यातील सुमठाणे शिवारात खून झालेल्या महिलेची ओळख पटली आहे. सदर महिला उंदीरखेडे येथील रहिवासी असून पैश्यांच्या वादातून आणि इतर कारणाने तिचा खून करण्यात आला असून पारोळा पोलिसांनी संशयिताला ताब्यात घेतले आहे.
तालुक्यातील सुमठाणे शिवारात एका ४८ वर्षीय महिलेचा डोक्यात दगड टाकून खून करण्यात आला आणि मृतदेह गोणीत भरून जंगलात फेकून देण्यात आला. ही घटना दि. २५ रोजी सायंकाळी ६:३० वाजण्याच्या सुमारास उघडकीस आली. याप्रकरणी महिला व खून करणारा संशयित आरोपी उंदीरखेडा (ता. पारोळा) येथील असल्याचे निष्पन्न झाले. या महिलेची कुठेही हरवल्याची नोंद नसल्याने पोलिसांपुढे मोठे आव्हान होते.(केसीएन)पोलीस अधीक्षक महेश्वर रेड्डी, अप्पर पोलीस अधीक्षक कविता नेरकर, डीवायएसपी विनायक कोते यांनी पोलीस निरीक्षक सचिन सानप, सहाय्यक पोलीस निरीक्षक चंद्रसेन पालकर, सहाय्यक पोलीस निरीक्षक योगेश महाजन, पोलीस उपनिरीक्षक अमरसिंग वसावे, हेडकॉन्स्टेबल शरद पाटील, महेश पाटील ,सुनील हटकर,आशिष गायकवाड, अनिल राठोड, संदीप सातपुते, अभिजित पाटील, मिथुन पाटील, महेंद्रसिंग राजपूत, सविता पाटील यांच्या पथकाला खुनाचा तपास करण्यास सांगितले.
तपासात महिलेचे नाव शोभाबाई रघुनाथ कोळी (वय ४८ रा उंदिरखेडा ता पारोळा) हे निष्पन्न झाले.शोभाबाई या धुणीभांडी करून उदरनिर्वाह करत होती. मुलगा गोपाळ कोळी यांच्यापासून त्या वेगळ्या राहत होत्या. त्यांचा मुलगा कामासाठी सुरत गेला होता. घरमालकाने गोपाळला फोन करून कळवले होते की, तुझी आई तीन दिवसांपासून कामावर आली नाही. गोपाळ गावाकडे आला. आईचा शोध घेत असताना त्याला पोलीस पाटलाने मयत महिलेचा फोटो दाखवला असता त्याला ओळख पटली. त्यांनतर पोलिसांनी तांत्रिक आधारावरून संशयित आरोपीला ताब्यात घेतले आहे. त्याच्याकडून इतर सहभागी आरोपींबाबतची माहिती घेतली जात आहे.
