मुक्ताईनगर तालुक्यात मलकापूर रस्त्यावर वनविभागाची कारवाई
मुक्ताईनगर ( प्रतिनिधी ) – मुक्ताईनगर वन विभागाने विनापरवाना लाकडाची वाहतूक करणारा ट्रक पकडला. महिला कर्मचाऱ्यांनी रात्री गस्तीवर असताना ही कारवाई केली. वन विभागाचे पथक २० जूनच्या रात्री मुक्ताईनगर वन परिक्षेत्रात गस्तीवर होते. मलकापूर ते मुक्ताईनगर दरम्यान बोदवड चौफुलीजवळ एक संशयास्पद ट्रक वेगाने जाताना दिसला.
रस्त्यावर असलेल्या महिला वन कर्मचाऱ्यांना संशय येताच त्यांनी पाठलाग करून एमएच.२८-बी. ७३२३ हा ट्रक थांबवला. वाहनाची तपासणी केली असता त्यात मिश्र प्रजातीचे जळावू लाकूड होते. चालकाकडे त्याचा परवाना नव्हता. त्यामुळे रुईखेड्याच्या वनपाल डी.ए. जाधव, हरताळा वनरक्षक दीपाली बेलदार, वनरक्षक आर.जी. शिर्के व सुरेश महाले यांनी ट्रक ताब्यात घेतला. या ट्रकमध्ये १४ घनमीटर लाकूड होते. त्याची किंमत सुमारे १० हजार रुपये आहे. वाहनाची बाजारभावानुसार किंमत १० ते ११ लाख रुपये आहे. मुक्ताईनगर वनपरिक्षेत्र अधिकारी कृपाली शिंदे यांच्या मार्गदर्शनाखाली ही कारवाई झाली. गेल्या आठवड्यात सुद्धा आरएफओ रुपाली शिंदे व दीपाली बेलदार यांनी विनापरवाना लाकडाची वाहतूक करणारा ट्रक पकडला होता. अवैध वृक्षतोड, लाकडांची विनापरवाना वाहतूक यावर वन विभागाचे पथक लक्ष ठेवून आहे.
