यावल तालुक्यातील कोरपावली येथील दुर्दैवी घटना
यावल (प्रतिनिधी) :- शेळ्या मेंढ्या पाळून उदरनिर्वाह करणाऱ्या एका १८ वर्षीय तरुणाचा सांडपाण्याच्या खड्ड्यामध्ये पडल्याने त्याचा चिखलात गुदमरून मृत्यू झाल्याची दुर्दैवी घटना यावल तालुक्यातील कोरपावली गावाबाहेर दि. ८ जून रोजी सायंकाळी ७ वाजेच्या सुमारास घडली. घटनेप्रकरणी यावल पोलीस स्टेशनला अकस्मात मृत्यूची नोंद करण्यात आली आहे.
जयेश संतोष महाजन (वय १८, रा. कोरपावली, ता. यावल) असे मयत तरुणाचे नाव आहे. कोरपावली गावाच्या बाहेर असणाऱ्या सांडपाण्याच्या खड्ड्यातील चिखलात ८ जून रोजी सायंकाळी ७ वाजता जयेश महाजन हा नेहमीप्रमाणे शेळ्या मेंढ्या चारून येत होता. तेव्हा एक शेळी खड्ड्यात पडल्याने तिला वाचवण्यासाठी तो देखील खड्ड्यात उतरण्याच्या प्रयत्नात होता. मात्र त्याचा तोल जाऊन तो चिखलात रुतल्याने त्याचा गुदमरून मृत्यू झाल्याची दुर्दैवी घटना घडली. घटनेची माहिती कळताच ग्रामस्थांनी घटनास्थळी धाव घेत त्याला खड्ड्यातून काढून यावल ग्रामीण रुग्णालयात दाखल केले. मात्र वैद्यकीय अधिकाऱ्यांनी जयेशला तपासून मृत घोषित केले. याबाबत यावल पोलीस स्टेशनला अकस्मात मृत्यूची नोंद करण्यात आली आहे.
