जळगाव — डॉ. उल्हास पाटील कॉलेज ऑफ फिजिओथेरपीमध्ये मलेरिया संपेल आपल्यामुळे – एकत्र या, गुंतवणूक करा, नव्याने सुरू करा या जागतिक घोषवाक्यानुसार जागतिक मलेरिया दिन जनजागृती करण्यात आली.
कार्यक्रमाचे आयोजन कार्डिओ विभागाच्या डॉ. शुभा शंकर साहू व डॉ. रिया अग्रवाल यांच्या पुढाकाराने करण्यात आले. या सेमिनारद्वारे मलेरियाच्या प्रतिबंध व नियंत्रणाबाबत जनजागृती करण्याचा प्रयत्न करण्यात आला. सेमिनार हॉलमध्ये पार पडलेल्या या कार्यक्रमाचे प्रमुख पाहुणे म्हणून डॉ. उल्हास पाटील वैद्यकिय महाविद्यालयाचे डॉ. चंद्रय्या अच्चन्ना कांते (विभाग प्रमुख मेडिसिन विभाग) उपस्थित होते. डॉ. स्वानंद जे.आर. यांनी मलेरियावर एक माहितीपूर्ण सादरीकरण केले, ज्यामध्ये संशोधन, निदान व उपचारातील नव्या घडामोडींवर सविस्तर माहिती दिली. या सेमिनारमध्ये प्रथम व तृतीय वर्षाच्या विद्यार्थ्यांनी उत्साहाने सहभाग नोंदवला आणि मलेरियासारख्या आजाराविषयी उपयुक्त माहिती मिळवली.कार्डिओ-रेस्पिरेटरी फिजिओथेरपी विभागाने हा कार्यक्रम अत्यंत यशस्वीरीत्या राबवला. या उपक्रमामुळे मलेरियाविरोधातील लढ्यात जनजागृतीचे महत्त्व अधोरेखित झाले. तसेच, विद्यार्थ्यांमध्ये सामाजिक जबाबदारीची जाणीव निर्माण झाली आणि मलेरियाच्या प्रतिबंधासाठी सामूहिक सहभागाची भावना दृढ झाली.
