भडगाव तालुक्यातील वाडे येथील घटना, वनविभागाची उदासीनता
भडगाव ( प्रतिनिधी ) – तालुक्यातील वाडे शिवारात नंदलाल जगन्नाथ माळी यांच्या शेतात बांधलेल्या जनावरांपैकी एका वासरावर बिबट्याने हल्ला चढविला. मात्र याचवेळी काहीच अंतरावर जेवणाला बसलेल्या सुरजमल पावरा या सालदाराने आरडाओरड केल्याने बिबट्याने धूम ठोकली व वासराचे प्राण वाचले. ही घटना २२ रोजी मंगळवारी रात्री साडेआठ वाजेच्या सुमारास घडली.
बिबट्याने हल्ला करताच सालदार पावरा याने बॅटरी चमकावत काठी जोरजोरात आपटत आरडाओरड केली. हे ऐकून शेजारील शेतकरी व गावातील नागरिकांनी हातात बॅटऱ्या व काठ्या घेत घटनास्थळी धाव घेतली. आरडा ओरड होताच बिबट्याने धूम ठोकली. जखमी वासरावर रात्रीच औषधोपचार करण्यात आले. या घटनेची माहिती वनविभागाच्या कर्मचाऱ्यांना कळवूनही घटनास्थळी कुणीच कर्मचारी पंचनामा अथवा पाहणीसाठी आले नाहीत, अशी शोकांतिका ग्रामस्थांनी व्यक्त केली.
