भुसावळ शहरात लाचलुचपत प्रतिबंधक विभागाची कारवाई
पाणीपुरवठा अभियंता सतीश सुरेश देशमुख, लिपिक शांताराम उखई सुरवाडे (वय ५७) व शाम समाधान साबळे (२८) अशी अटकेतील संशयित आरोपींची नावे आहेत.
तक्रारदार हे ४६ वर्षीय प्लंबर आहेत. त्यांचे प्रत्येक वर्षाला परवाना नूतनीकरण करावे लागते. त्यासाठी पाणीपुरवठा विभागात गेल्यानंतर शाम साबळे यांनी बुधवारी ७०० रुपयांची लाच मागितली व साबळे यांनी पाणीपुरवठा अभियंता देशमुख यांना फोन केल्यानंतर त्यांनी ६०० रुपये लागतील, असे सांगितले. त्यांनी एसीबीकडे तक्रार केली. सुरुवातीला लिपिक शांताराम सुरवाडे यांनी सहाशे रुपयांची लाच स्वीकारताच त्यांना अटक करण्यात आली. इतर दोन्ही संशयित आरोपींनी लाचेला प्रोत्साहन दिल्यानंतर त्यांनाही अटक केली. आरोपींविरोधात शहर पोलिसांत गुन्हा दाखल करण्यात आला.
शाम यांच्याकडील मोबाइल तसेच अभियंता देशमुखकडील मोबाइल व दोन हजार रुपये तसेच सुरवाडे यांच्याकडील एक हजार व मोबाइल जप्त करण्यात आला. आरोपी देशमुखच्या घराची झडती घेण्यात आली. या कारवाईमुळे भुसावळ नगरपालिकेच्या अधिकारी व कर्मचाऱ्यांमध्ये खळबळ उडाली आहे.
