धुळ्याच्या व्यक्तीला अटक, चाळीसगाव शहर पोलीस स्टेशनला गुन्हा दाखल
चाळीसगाव (प्रतिनिधी) : रेल्वेच्या ई-तिकिटांचा अवैधरित्या काळाबाजार करणाऱ्या धुळ्यातील एकावर आरपीएफ पथकाने कारवाई केली आहे. संशयिताकडून एकूण १२ लाख ५३ हजार ८६० रुपयाची २९९ ई-तिकिटे जप्त करण्यात आली आहे. चाळीसगाव रेल्वे पोलिसात या संशयितावर गुन्हा दाखल करण्यात आला आहे.
धुळे शहरातील यूजर आयडीवरून अनधिकृतरित्या रेल्वे आरक्षण तिकिटांचा काळाबाजार सुरू असल्याची माहिती पोलिसांना मिळाली. त्यानुसार भुसावळ येथील वरिष्ठ मंडल सुरक्षा आयुक्तांच्या आदेशावरून चाळीसगाव आरपीएफ निरीक्षकांच्या मार्गदर्शनात धुळे चौकीच्या पथकाने धुळे शहर पोलिसांच्या मदतीने
छापा टाकला. त्यात राजेंद्र सयाजी गांगुर्डे (वय ३८, रा. नवजीवन नगर, धुळे) या संशयित आरोपीला ताब्यात घेण्यात आले. त्याच्या मोबाईल तपासणीत १९ आगामी प्रवासासाठीची व २८० संपलेल्या प्रवासासाठीची ई-तिकिटे सापडली.
ज्यांची एकूण किंमत १२ लाख ५३ हजार रुपये आहे. हे तिकिटे त्याच्या मोबाईलद्वारे तयार करण्यात आले होते. ज्यात कोणताही आयआरसीटीसी एजंट परवाना नव्हता. दरम्यान, चौकशीत त्याने गुन्ह्याची कबुली ही दिली आहे. पोलिसांनी मोबाईल व दोन सिमकार्डसह सर्व तिकिटे जप्त केली आहेत. तर संशयित आरोपी राजेंद्र गांगुर्डे याच्याविरुद्ध चाळीसगाव आरपीएफ रेल्वे पोलीस ठाण्यात गुन्हा नोंदवण्यात आला आहे. तपास सपोनि राजेंद्र भामरे करत आहेत.
