जामनेर तालुक्यातील शहापूर रस्त्यावरील घटना
जळगाव (प्रतिनिधी) : जामनेर तालुक्यातील शहापूर रस्त्यावर दुचाकीला भरधाव छोटा हत्ती वाहनाने दिलेल्या जबर धडकेत इसमाचा मृत्यू झाला असून एक जण जखमी झाला आहे. याप्रकरणी संबंधित पोलीस स्टेशनला घटनेची नोंद घेण्याचे काम सुरु होते.
आनंदा तुळशीराम शेळके (वय ५०, रा. कासली ता. जामनेर) असे मयत इसमाचे नाव आहे. कासली गावात ते पत्नी, १ मुलगा यांचेसह राहत होते. शेतीकाम करून ते परिवाराचा उदरनिर्वाह करीत होते.(केसीएन)दरम्यान, आनंदा शेळके हे गावातील वयोवृद्ध धनराज दत्तात्रय पाटील (वय ७२) यांचेसह जामनेर येथे दुचाकीने बुधवारी दि. १९ मार्च रोजी संध्याकाळी ५ वाजेच्या सुमारास जात होते. शहापूर रस्त्यावर पेट्रोलपंपाजवळ दुचाकी आली असताना त्यांना समोरून येणाऱ्या छोटा हत्ती वाहनाने जबर धडक दिली. यात आनंदा व धनराज पाटील हे रस्त्याच्या कडेला फेकले गेले.
दोघांनाही जळगाव येथील शासकीय वैद्यकीय महाविद्यालय व रुग्णालयात दाखल करण्यात आले होते. यात धनराज पाटील यांना किरकोळ मार लागला आहे. तर डोक्याला जबर मार लागल्यामुळे आनंदा शेळके यांचा उपचारादरम्यान, साडे सात वाजेच्या सुमारास मृत्यू झाला आहे. यावेळी कुटुंबीयांनी शोक व्यक्त केला. शेतकऱ्याच्या मृत्यूमुळे कासली गावावर शोककळा पसरली आहे. घटनेप्रकरणी संबंधित पोलीस स्टेशनला नोंद घेण्याचे काम सुरु होते.
