नशिराबाद येथे एलसीबीची कारवाई
जळगाव (प्रतिनिधी) : नशिराबाद पोलिस ठाण्याच्या हद्दीत अवैधरित्या घरगुती गॅस सिलेंडरमधून ऑटो रिक्षामध्ये गॅस भरला जात असल्याची माहिती मिळताच स्थानिक गुन्हे शाखेच्या पथकाने धडक कारवाई करत मोठा गॅस साठा जप्त केला.
गुरुवारी दि. ७ मार्च रात्रगस्ती दरम्यान पोलिसांना ही बाब निदर्शनास आल्यानंतर तात्काळ कारवाई करण्यात आली. संशयित आफताब आलम शेख रहीम (वय २८, रा. रहमतपुर, नशिराबाद) याला ताब्यात घेण्यात आले असून, ३.९६ लाख रुपये किमतीचा मुद्देमाल जप्त करण्यात आला आहे. नशिराबाद पोलिस ठाण्याच्या हद्दीत एका इसमाला घरगुती गॅस सिलेंडरमधून ऑटो रिक्षामध्ये गॅस भरताना आढळून आले. पोलिसांना पाहताच रिक्षाचालकाने अंधाराचा फायदा घेत पळ काढला.
त्यानंतर पोलिसांनी घटनास्थळी शोधमोहीम राबवत आफताब आलम शेख रहीम याला ताब्यात घेतले. तपासणीदरम्यान, टाटा एस कंपनीची मालवाहतूक गाडी, १३ भरलेले गॅस सिलेंडर, ४ रिकामे सिलेंडर, १ अर्धे भरलेले सिलेंडर आणि गॅस भरण्याचे साहित्य असा ३,९६,१५० रुपये किमतीचा मुद्देमाल जप्त करण्यात आला. सदर प्रकरणी गुन्हा दाखल करण्यात आला आहे.
ही कारवाई पोलीस उपनिरीक्षक शरद बागल यांच्या नेतृत्वाखालील पोलीस हवालदार कमलाकर बागुल, गजानन देशमुख, गोपाळ गव्हाळे, संघपाल तायडे आणि पोलीस कॉन्स्टेबल सचिन पोळ यांनी सक्रिय सहभाग घेतला.पुढील तपास नशिराबाद पोलिस ठाणे करीत आहे.
