जळगाव तालुक्यातील असोदा येथून अटक
जळगाव (प्रतिनिधी) – शहरातील जुना खेडी रोड परिसरात महिलांच्या गळ्यातील मंगळसूत्र हिसकावून चोरी करणाऱ्या संशयित आरोपीला जळगाव पोलिसांनी आसोदा गावातून रविवारी दुपारी २ वाजता अटक केली आहे.
गणेश राजेंद्र माळी (वय २९, रा. आसोदा, ता. जि. जळगाव) असे संशयीत आरोपीचे नाव आहे. त्याने तीन गुन्ह्यांची कबुली दिली असून त्याच्याकडून २३ ग्रॅम सोन्याचे मंगळसूत्र जप्त करण्यात आले आहे. पुढील कारवाईसाठी त्याला शनिपेठ पोलिसांच्या ताब्यात देण्यात आले आहे, अशी माहिती जिल्हा पोलीस अधीक्षक डॉ. महेश्वर रेड्डी यांनी सोमवारी झालेल्या पत्रकार परिषदेत दिली आहे. गेल्या दोन महिन्यांपासून शनिपेठ आणि एमआयडीसी पोलिस ठाण्याच्या हद्दीत सोनसाखळी चोरीच्या घटना घडल्या होत्या. याबाबत संबंधित पोलीस ठाण्यात गुन्हा दाखल करण्यात आला होता. या गुन्ह्यातील संशयित आरोपींना पकडण्यासाठी पोलीस अधीक्षक, अप्पर पोलीस अधीक्षक आणि उपविभागीय पोलीस अधिकारी यांनी सूचना दिल्या होत्या. त्यानुसार, वेगवेगळ्या घटनांच्या सीसीटीव्ही फुटेज आणि तांत्रिक पुराव्याच्या आधारावर तपास सुरू करण्यात आला. अखेर शनिपेठ पोलिसांनी संशयित आरोपी गणेश राजेंद्र माळी याला आसोदा गावातून अटक केली आहे.
