रावेर शहरासह वाघोड गावात घडली घटना
रावेर (प्रतिनिधी) : तालुक्यातील वाघोड येथील एका अनोळखी व्यक्तीने रेल्वेसमोर उडी घेऊन आत्महत्या केल्याची घटना घडली आहे. तर रावेर शहरातील एका युवकाने राहत्या घरात गळफास घेऊन आत्महत्या केल्याचेही समोर आले आहे. याबाबत रावेर पोलीस ठाण्यात अकस्मात मृत्यूची नोंद करण्यात आली आहे.
तालुक्यातील वाघोड येथे सोमवारी सकाळी ९ वाजेच्या सुमारास खंबा नंबर ४८४/ २२ दरम्यान एका अनोळखी व्यक्तीने रेल्वेसमोर उडी घेऊन आत्महत्या केली. याबाबत रावेर रेल्वे स्थानक व्यवस्थापकांनी दिलेल्या माहितीवरून रावेर पोलीस ठाण्यात नोंद करण्यात आली आहे. तपास पोलीस हेड कॉन्स्टेबल विजय चौधरी करत आहेत.
दरम्यान, दुसऱ्या घटनेत शहरातील सौभाग्य नगरातील अनिल लालचंद चौधरी (वय ४८) या युवकाने आपल्या राहत्या घरात गळफास घेऊन आत्महत्या केली. या बाबत मयताचा भाऊ सुनील चौधरी याने रावेर पोलीस ठाण्यात दिलेल्या माहितीवरून अकस्मात मृत्यूची नोंद करण्यात आली आहे. आत्महत्येचे कारण समजू शकले नाही. तपास पोलीस हेडकॉस्टेबल विष्णू भिल करीत आहेत.
