जळगाव एसीबीची कारवाई
पारोळा (प्रतिनिधी) : तालुक्यातील मेहु गावातील विद्यमान महिला सरपंच, तिचा पती, मुलगा आणि सेतू सुविधा केंद्र चालक अशा चारही जणांना ४० हजार रुपयांची लाच घेताना पकडल्याने तालुक्यात खळबळ उडाली आहे. ही कारवाई जळगावच्या एसीबी पथकाने केली असून याबाबत पारोळा पोलीस ठाण्यात गुन्हा दाखल करण्याचे काम सुरू होते.
मेहु गावात सात लाख रुपये किमतीची व्यायामशाळा बांधण्यासाठी धनश्री कंट्रक्शन या कंपनीला करार देण्यात आला होता. या प्रकल्पासाठी २०२३ मध्ये लोकनियुक्त सरपंच म्हणून जिजाबाई गणेश पाटील यांची निवड झाली होती. त्यानंतर धनश्री कंट्रक्शनच्या प्रतिनिधीने सरपंचांकडे मंजूर निधीची मागणी केली. यावेळी सरपंचांनी ७ लाख रुपयांपैकी ४ लाख रुपयांचा धनादेश कंपनीला दिला होता. उर्वरित ३ लाख रुपयांचा निधी देण्यासाठी सरपंचांनी ७० हजार रुपयांची लाच मागितली होती.सरपंच जिजाबाई गणेश पाटील यांच्या पती गणेश सुपडू पाटील यांनी या रकमेची तडजोड करून ती ४० हजार रुपयांवर आणली.
त्यानंतर सरपंचांच्या मुलगा शुभम गणेश पाटील आणि सेतू सुविधा केंद्र चालक समाधान देवसिंग पाटील याला लाच स्वीकारण्यासाठी प्रोत्साहन दिले. या प्रकरणात अँटी करप्शन ब्युरोच्या पोकॉ राकेश दुसाने आणि पोकॉ अमोल सुर्यवंशी यांनी सापळा रचला. त्यांनी सरपंच जिजाबाई गणेश पाटील, तिचा पती गणेश सुपडू पाटील, मुलगा शुभम गणेश पाटील आणि सेतू सुविधा केंद्र चालक समाधान देवसिंग पाटील यांना लाच घेताना पकडले. घटनेप्रकरणी पारोळा पोलीस ठाण्यात गुन्हा दाखल करण्यात आला असून, पुढील तपास सुरू आहे.
