पारोळा येथे कृषी विभागाने लावला सापळा, गुन्हा दाखल
जळगाव (प्रतिनिधी) : पारोळा तालुक्यातील एक कृषी विक्रेता जादा दराने बियाणे विक्री करत असल्याने त्याच्यावर सापळा रचून गुन्हा दाखल करण्यात आला आहे. खरीप हंगामाची तयारी सुरु आहे. शेतकरी कापसाचे बियाणे खरेदी करत आहेत. काही विक्रेते जादा दराने कापसाचे बियाणे विक्री करत आहेत. मात्र काही विक्रेते शेतकऱ्यांना लुटण्याचा प्रयत्न करीत असल्याच्या तक्रारी कृषी विभागाला मिळत आहेत.
पारोळा येथील गायत्री ऍग्रो एजन्सी येथे कापूस बियाणे जादा दराने विक्री करत असल्याची गोपनीय माहिती कृषी विभागाच्या भरारी पथकाला रविवारी दि. २६ मे रोजी मिळाली होती. त्यानुसार जिल्हा अधीक्षक कृषी अधिकारी कुरबान तडवी, जिल्हा परिषदेचे कृषी विकास अधिकारी सुरज जगताप यांच्या मार्गदर्शनाखाली व गुप्त माहितीच्या आधारे जिल्हा भरारी पथकाने डमी ग्राहक म्हणून एका शेतकऱ्यास दुकानावर पाठविले. येथे विक्रेत्याने ८६४ रुपयास मिळणारे कापूस पिकाचे कबड्डी वाण बाराशे रुपये किमतीस शेतकऱ्यास विक्री करताना रंगेहाथ पकडले.
त्यानुसार पारोळा पोलीस स्टेशन येथे दि. २७ मे रोजी जिल्हा गुणवत्ता नियंत्रण निरीक्षक विकास बोरसे यांनी गुन्हा दाखल केला आहे. सदर कारवाई उपविभागीय कृषी अधिकारी अमळनेर सी. डी. साठे, विभागीय नियंत्रण निरीक्षक नितेंद्र पानपाटील, जिल्हा गुण नियंत्रण निरीक्षक विकास बोरसे, मोहीम अधिकारी विजय पवार, कृषी अधिकारी पंचायत समिती पारोळा दिनेश कोते, कृषी सहायक रोहित शिंदे यांनी केली. पुढील तपास पोलीस उपनिरीक्षक बाळू गीते करीत आहेत.
