जळगाव ( प्रतिनिधी ) – जळगाव शहरातील शाहू नगर परिसरातील एका तरूणाची १ लाख ८० हजार रूपये किंमतीची तवेरा कार घरासमोरून अज्ञात चोरट्यांनी चोरून नेल्याची घटना समोर आली आहे. याप्रकरणी शनिवारी ७ जानेवारी रोजी दुपारी १ वाजता शहर पोलीस स्टेशनला गुन्हा दाखल करण्यात आला आहे.
याबाबत सविस्तर वृत्त असे की, जितेंद्र कैलास मुळीक (वय-३८) रा. महेश किरणा जवळ, शाहूनगर जळगाव हा तरूण आपल्या परिवारासह राहायला आहे. खासगी वाहन चालवून आपला उदरनिर्वाह करतो. त्यांच्याकडे त्याच्या मालकीची (एमएच १९ बीजे ००५७) क्रमांकाची कार आहे. नेहमी प्रमाणे तवेरा कार ४ जानेवारी रोजी रात्री १० वाजता शाहु नगरातील नक्षत्र बिल्डींग जवळ पार्किंगला लावलेली होती. मध्यरात्री अज्ञात चोरट्यांनी १ लाख ८० हजार रूपये किंमतीच कार चोरून नेल्याचे ५ जानेवारी रोजी सकाळी ७ वाजता उघडकीला आले. त्यांने कारचा सर्वत्र शोध घेतला परंतू कोणतीही माहिती मिळाली नाही. अखेर शनिवारी ७ जानेवारी रोजी दुपारी १ वाजात शहर पोलीस स्टेशनला दिलेल्या तक्रारीवरून अज्ञात चोरट्यांविरोधात गुन्हा दाखल करण्यात आला आहे. पुढील तपास पोलीस नाईक प्रफुल्ल धांडे करीत आहे.
