जळगाव (प्रतिनिधी) – शहरातील शिवकॉलनीत बंद घर फोडून चोरट्यांनी घरातील रोकड, टीव्हीसह घरासमोर उभी दुचाकी चोरुन नेल्याची घटना समोर आली आहे. विशेष म्हणजे, अंगणात नवीन दुचाकी लावलेली असताना, चोरटयांनी जुनी, वापरात नसलेली स्कुटीच पळवून नेल्याने आश्चर्य व्यक्त होत आहे. याप्रकरणी रामानंदनगर पोलीस ठाण्यात गुन्हा दाखल झाला आहे.
जळगाव शहरातील शिवकॉलनी येथे मधुकर श्रावण पाटील (वय ६४) हे त्यांची पत्नी विद्या यांचेसह राहतात. मधुकर पाटील सेवानिवृत्त प्राध्यापक असून विद्या पाटील या माध्यमिक शिक्षिका आहेत. ते सध्या सुट्ट्या असल्यामुळे चंदिगढ येथे फिरायला गेलेले आहेत. काही दिवसांपासून घर बंद असल्याचे पाहून चोरटयांनी त्यांच्या घरात शिरकाव केला. घरातील बंद पडलेला टीव्ही, घरातील ११ हजाराची रोकड चोरटयांनी लंपास केली. तसेच २० हजार रुपयांची अंगणात उभी असलेली स्कुटी हि दुचाकीदेखील त्यांनी पळवली. मात्र शेजारी उभी असलेली नवीन दुचाकी मात्र तशीच ठेवली.
मधुकर पाटील हे सध्या चंदिगढ येथे पत्नीसह फिरायला गेलेले असल्याने त्यांचे शालक डॉ. सुशील गुर्जर यांनी शनिवारी रामानंदनगर पोलीस ठाण्यात तक्रार दिली. या तक्रारीनुसार अज्ञात चोरट्यांविरोधात रामानंदनगर पोलीस ठाण्यात गुन्हा दाखल झाला आहे. पुढील तपास पोलीस हेडकॉन्स्टेबल सुशील चौधरी हे करीत आहेत.
