जळगाव (प्रतिनिधी) – अयोध्या नगर परिसरातील हनुमान नगरात शुक्रवारी अज्ञात चोरटयांनी घरफोडी करीत ९६ हजारांचा ऐवज लांबविला. याप्रकरणी एमआयडीसी पोलीस स्टेशनला गुन्हा दाखल करण्यात आला आहे.
विशाल गोपाल पाटील (वय ३६) हे हनुमान नगर येथे परिवारासह राहतात. ते १ मार्च रोजी धरणगाव तालुक्यातील कवठळ येथे नातेवाईकांच्या लग्नाला गेले होते. त्यांचे वडील गोपाल पाटील हे शुक्रवारी सकाळी लग्नाला गेले. दिवसभर घर बंद असल्याचे पाहत अज्ञात चोरटयांनी त्यांच्या घराचा कडीकोयंडा तोडून घरात प्रवेश केला. गोदरेज कपाट उघडून त्यातील सामान अस्ताव्यस्त करीत तिजोरीतील किमती वस्तू चोरून नेल्या. घर उघडे दिसल्याचे पाहून शेजारी राहणार मावसभाऊ योगेश महाजन याने विशाल पाटील यांना याबाबत माहिती दिली.
तिजोरीतील ९ हजार रोख, ७० हजाराच्या सोन्याच्या बांगड्या, तसेच १७ हजाराचे सोन्याचे इतर दागिने असा ९६ हजाराचा मुद्देमाल चोरून नेला आहे. याप्रकरणी विशाल पाटील यांनी दिलेल्या फिर्यादीवरून एमआयडीसी पोलीस स्टेशनला गुन्हा दाखल करण्यात आला आहे. तपास सहाय्यक फौजदार अतुल वंजारी करीत आहेत.
