अमळनेर (प्रतिनिधी) – नाशिकच्या प्रसिद्ध पंचवटी येथील सप्तशृंगी देवीच्या मंदिरात पादुका चोरी करून फरार झालेल्या चोरट्यास अमळनेर शहरात खबऱ्यांच्या सतर्कतेने जेरबंद करण्यात पोलिसांना यश आले आहे. सदर चोरट्यास नाशिक पोलिसांच्या ताब्यात देण्यात आले आहे.
नाशिक येथील पंचवटी भागात सप्तशृंगी मंदिरामध्ये २६ मे रोजी अज्ञात चोरट्याने पादुका चोरी करून फरार झाला होता. याबाबत पंचवटी पोलीस स्टेशनला गुन्हा दाखल झालेला होता. प्रश्न लोकांच्या भावनांशी निगडित असल्यामुळे पोलिसांनी तपास सुरू ठेवला होता. दरम्यान अमळनेर शहरांमध्ये पोलिसांना एका खबऱ्याने टीप दिली की, नाशिक मधील एक इसम रोजंदारीवर काम करीत आहे व त्याचे हालचाली संशयास्पद दिसत आहे.
त्यामुळे अमळनेर पोलीस स्टेशनच्या कर्मचाऱ्यांनी सदर इसमाची माहिती घेतली असता तो चोरी करून फरार झालेला इसम असल्याचे समजले. त्यानुसार त्याला ताब्यात घेण्यात आले. किशोर चव्हाण रा.उत्तर प्रदेश असे या चोरट्याचे नाव आहे. चोरी केल्यानंतर तो अमळनेर शहरात लपून बसला होता. तो रोज विदेशी दारू पिऊन मोजमस्ती करीत आहे अशी माहिती खबरऱ्यांनी दिली होती. त्यानुसार उपविभागीय पोलिस अधिकारी सुनील नंदवाळकर, पोलीस निरीक्षक विजय शिंदे यांच्या मार्गदर्शनाखाली पोलीस कर्मचारी भटूसिंग तोमर, मिलिंद भामरे, सुनील हटकर, कपिल पाटील, जितेंद्र निकुंभे अशांनी त्यास ताब्यात घेऊन अटक केली आहे.
त्याने मंदिरात चोरी केल्याचे कबूल केले असून त्याला नाशिक पोलिसांच्या ताब्यात देण्यात आले आहे.
