जळगाव ( प्रतिनिधी ) – जळगाव शहरातील अजिंठा चौफुलीवरील सातपुडा शोरूमसमोर भरधाव टँकरने दिलेल्या धडकेत दुचाकीवरील वृद्ध जागीच ठार झाल्याची घटना शुक्रवारी ३० डिसेंबर रोजी सायंकाळी ५ वाजेच्या सुमारास घडली. याप्रकरणी टँकरचालका विरोधात एमआयडीसी पोलीस स्टेशनला गुन्हा दाखल करण्यात आला आहे.
याबाबत सविस्तर वृत्त असे की, मनोहर काशिनाथ पाटील (वय-६३) रा. आयोध्या नगर, जळगाव हे आपल्या परिवारासह राहायला होते. ३० डिसेंबर रोजी सायंकाळी ५ वाजेच्या सुमारास मनोहर पाटील हे स्कुटी (एमएच १९ एक्स ८३३४)ने कुसुंबा गावाकडून अजिंठा चौफुलीकडे येत असताना सातपुडा शोरूमच्या समोर भरधाव टँकर क्रमांक (एमएच ४३ व्हाय ८९०२) ने जोरदार धडक दिली. या धडकेत मनोहर काशिनाथ पाटील यांचा जागीच मृत्यू झाला. ही घटना घडल्यानंतर एमआयडीसी पोलीस स्टेशनचे पोलीस कर्मचारी यांनी घटनास्थळी जाऊन पंचनामा केला. जिल्हा शासकीय वैद्यकीय महाविद्यालयात मृतदेह रवाना करण्यात आला. या संदर्भात टँकर चालकाविरोधात एमआयडीसी पोलीस स्टेशनला रात्री १० वाजता गुन्हा दाखल करण्यात आला आहे. या घटनेचा पुढील तपास पोहेकॉ संजय धनगर करीत आहे.
