पाचोरा (प्रतिनिधी) – तालुक्यातील लासगाव येथील विवाहितेने आपल्या पाच महिन्याच्या चिमुकल्यासह शेत शिवारातील विहीरीत उडी घेऊन आत्महत्या केल्याची धक्कादायक घटना मंगळवारी ३० मे रोजी उघडकीस आल्याने एकच खळबळ उडाली आहे. घटनेप्रकरणी पाचोरा पोलिस स्टेशनमध्ये अकस्मात मृत्यूची नोंद करण्यात आली आहे.
लासगाव येथील आरिफ शेख यांचा विवाह गावातीलच त्यांचे मामाची मुलगी लजिनाबी हिच्याशी झाला होता. लग्नानंतर या दाम्पत्यांना पुत्ररत्न प्राप्त होवुन त्याचे नाव असद ठेवण्यात आले. २८ मे रोजी गावात समाज बांधवातील लग्न असल्याने आरिफ शेख यांच्या परिवारास आमंत्रित करण्यात आले होते. आरिफ शेख हे परिवारासह लग्नात सहभागी होण्यासाठी गेले. मात्र लजिनाबी यांनी सांगितले की, असद व मी थोड्यावेळात येतो.
आरिफ शेख व त्यांचे आई, वडील लग्न समारंभात निघुन गेले. मात्र खुप वेळ होवुनही लजिनाबी ह्या लग्नात पोहचल्या नाही. यावेळी आरिफ शेख यांनी घर गाठले असता लजिनाबी व असद हे घरी नसल्याचे निदर्शनास आले. यावेळी लजिनाबी व असद यांचा सर्वत्र शोध घेतला असता ते मिळुन आले नाही. शेवटी हताश होऊन आरिफ शेख यांनी पाचोरा पोलिस स्टेशनमध्ये लजिनाबी व असद यांची बेपत्ता झाल्याची नोंद केली. दरम्यान मंगळवारी ३० मे रोजी गावातील शेत शिवारातील विहीरीत लजिनाबी व असद यांचा मृतदेह आढळून आला.
घटनेची माहिती मिळताच पाचोरा पोलिस स्टेशनचे पोलिस निरीक्षक राहुल खताळ, पोलिस कॉन्स्टेबल मुकुंद परदेशी, राहुल बेहरे, दिलीप वाघमोडे यांनी घटनास्थळी दाखल झाले. लजिनाबी आरिफ शेख व असद आरिफ शेख यांचे मृतदेह पाचोरा ग्रामीण रुग्णालयात दाखल करण्यात आले. घटनेप्रकरणी पाचोरा पोलिसात अकस्मात मृत्यूची नोंद करण्यात आली आहे. घटनेचा पुढील तपास पोलिस निरीक्षक राहुल खताळ यांच्या मार्गदर्शनाखाली पोलिस कर्मचारी करीत आहे.
