जळगाव (प्रतिनिधी) – दिल्ली येथे महिला व पुरुष खेळाडूंबाबत दिल्ली पोलिसांनी केलेल्या कृत्याचा जळगाव येथील क्रीडा प्रेमींनी निषेध नोंदवित, दिल्ली पोलिसांवर त्वरित कारवाई करण्यात यावी व महिला खेळाडूंच्या न्याय मागण्याची पूर्तता करण्यात यावी अशी मागणी महामहिम राष्ट्रपती द्रोपदी मूर्म यांच्याकडे जिल्हाधिकारी अमन मित्तल यांच्यामार्फत निवेदनाद्वारे करण्यात आलेली आहे.
दिल्ली पोलीस हाय हाय.. ब्रुजभूषण त्वरित अटक करा..ब्रुजभूषण ची कुस्ती महासंघाच्या अध्यक्षपदावरून हकालपट्टी करा …गैर कृत्य करणाऱ्या पोलिसांवर कायदेशीर कारवाई करा.. महिला खेळाडूंना न्याय द्या… अशा विविध घोषणा निवेदन देण्याच्या आधी देण्यात आल्या.
आपल्या भावना महामहीम राष्ट्रपतींना कळविण्यात येईल असे आश्वासन जिल्हाधिकारी अमन मित्तल यांनी शिष्टमंडळाला दिले. जळगाव जिल्हा व राज्यस्तरीय विविध क्रीडा संघटनाचे पदाधिकारी फारुक शेख, सामाजिक न्याय विभागाच्या प्रमुख श्रीमती प्रतिभा शिरसाठ, बास्केटबॉल, बुद्धिबळ व स्केटिंगचे प्रशिक्षक संजय पाटील, ध्यानचंद अकॅडमीचे सत्यनारायण पवार, कॅरम संघटनेचे सय्यद मोहसीन, फुटबॉल संघटनेचे चंद्रशेखर देशमुख व ताहेर शेख , हॉकी संघटनेचे भुसावळचे इम्तियाज शेख, लियाकत अली व अकील शेख, राष्ट्रवादी काँग्रेसचे मजहर पठाण, अपंग संघटनेचे मुजाहिद खान, कुल जमातीचे अध्यक्ष सय्यद चांद , मरकज फाउंडेशनचे मोहसिन युसुफ, हुसेनी सेना चे फिरोज शेख, तांबापुर फाउंडेशनचे वसीम बापू व शाहरुख बागवान, इमदाद फाउंडेशनचे मतीन पटेल, शिकलगार फाउंडेशनचे अन्वर खान, जुबेर शेख सुलतान आदींची उपस्थिती होती.
