नवी दिल्ली (वृत्तसंस्था) – ॲलोपॅथी आणि डॉक्टरांसंदर्भात वादग्रस्त वक्तव्य करुन योगगुरु बाबा रामदेव चांगलेच अडचणीत आले आहेत. त्यांच्या अडचणीत आता आणखी वाढ झाली आहे. इंडियन मेडिकल असोसिएशन (IMA) उत्तराखंडने बाबा रामदेव यांना 1 हजार कोटी रुपयांची मानहानी नोटीस पाठवली आहे. यामध्ये बाबा रामदेव यांनी पुढील 15 दिवसांत त्यांच्या वक्तव्याचे खंडन करणारा व्हिडीओ जारी करुन लेखी माफी मागायला सांगितले आहे.
आएमए उत्तराखंडचे प्रदेश सचिव डॉ. अजय खन्ना यांच्याकडून मंगळवारी रामदेव यांना सहा पानांची नोटीस धाडण्यात आली आहे. या नोटिशीत म्हटले आहे की, बाबा रामदेव यांनी 15 दिवसांच्या आत खंडन व्हिडीओ आणि लेखी स्वरुपात माफी मागितली नाही, तर त्यांच्याकडे 1 हजार कोटी रुपयांची मागणी केली जाईल. तसेच बाबा रामदेव यांना 72 तासांच्या आत, कोरोनिल किटची दिशाभूल करणारी जाहिरात देखील सर्व ठिकाणांहून हटविण्यास सांगितले आहे. कोरोनिल कोविड व्हॅक्सीननंतर होणाऱ्या साईड इफेक्ट्सवर प्रभावी असल्याचा दावा, या जाहिरातीत करण्यात आला आहे.
बाबा रामदेव यांच्या व्हायरल झालेल्या व्हिडीओतून त्यांनी ॲलोपॅथी उपचार करणाऱ्या डॉक्टरांच्या प्रतिमेला धक्का देण्याचा प्रयत्न केला. त्यामुळे त्यांच्यावर मानहानीचा दावा दाखल करण्याखेरीज त्यांच्यावर एफआयआरही दाखल करण्यात येईल, असेही खन्ना यांनी म्हटले आहे.
एका कार्यक्रमात बोलताना बाबा रामदेव म्हणाले होते, ॲलोपॅथी औषधं घेतल्याने लाखो लोकांचा मृत्यू झाला आहे. ॲलोपॅथी स्टुपीड आणि दिवाळखोर सायन्स असल्याचे बाब रामदेव म्हणाले होते. त्यांच्या या वक्तव्यावरुन वाद वाढल्यानंतर आणि केंद्रीय मंत्री डॉ. हर्षवर्धन यांच्या भूमिकेनंतर रामदेव यांनी आपले वक्तव्य मागे घेतले होते.
