जळगाव (प्रतिनिधी) – जळगाव शहरातील गुजराल पेट्रोल पंपाजवळील उड्डाणपूलावर सुसाट दुचाकी दुभाजकावर आदळून दोन मित्र चारचाकी वाहनाच्या खाली येवून ठार झाल्याची दुर्देवी घटना शनिवारी 24 डिसेंबर रोजी दुपारी १ वाजता घडली.
मयूर विठ्ठल लंके – साळूंखे (वय-१९, रा. पथराड, ता. धरणगाव) व दीपक समाधान पाटील (वय – २१, रा. बोरखेडा, ता. धरणगाव) असे अपघातातील मृतांची नावे आहेत.
याबाबत अधिक माहिती अशी की, जळगावातील मित्राला भेटून मयूर आणि दीपक हे शनिवारी २४ डिसेंबर रोजी दुपारी १ वाजेच्या सुमारास घराकडे सुसाट निघाले होते. गुजराल पेट्रोल पंपाजवळील उड्डाणपूलावर अचानक दुभाजकावर दुचाकी आदळल्यानंतर दोघे रस्त्याच्या दुसऱ्या बाजूच्या रस्त्यावर फेकले जाऊन ते चारचाकी वाहनाच्या चाकाखाली आले. यात मयूर याचा जागीच मृत्यू झाला तर दीपक याचा खाजगी रूग्णालयात उपचार सुरू असताना मृत्यू झाला. अपघातात दोन्ही वाहनांचे नुकसान झाले असून याबाबत जिल्हापेठ पोलिस स्टेशनला नोंद करण्यात आली आहे.
