जळगाव (प्रतिनिधी) – गेल्या १५ वर्षांपासून असलेल्या ओळखीचा गैरफायदा घेत एका परिवाराला २२ लाखांना फसवणूक केल्याचे समोर आले आहे. प्रकरणी रविवार, २६ मार्च रोजी रामानंदनगर पोलीस ठाण्यात तीन जणांविरोधात गुन्हा दाखल झाला आहे.
शहरातील शिवकॉलनी येथे प्रविणचंद पांडूरंग दिघोळे हे परिवारासह राहतात. दिघोळे हे युनायटेड इंन्शुरन्स कंपनीत नोकरीला आहेत. धुळे येथे राहणारा मित्र चंद्रभान जवरीलाल ओसवाल व त्याचा लहान भाऊ अनिल जवरीलाल ओसवाल यांच्याशी त्यांची १५ वर्षापासून ओळख आहे. प्रविणचंद दिघोळे यांचा मुलगा राजकुमार याला मंत्रालयात चांगल्या पदावर नोकरी लावून देतो. आमची मोठ्या पदावरील अधिकाऱ्यांशी ओळख असे सांगून ओसवाल बंधूंनी दिघोळे यांचा विश्वास संपादन केला.
सुरुवातीला मंत्रालयात मोठ्या पदावर सरकारी नोकरी लावून देतो असे सांगत ओसवाल बंधूनी २२ लाख रुपये द्यावे लागतील असे प्रवीणचंद दिघोळे यांना सांगितले. त्यानुसार दिघोळे यांनी सुरुवातीला १० मे २०१८ रोजी शिवकॉलनी येथे घरी ९ लाख रूपये दिले. ओसवाल बंधूंनी उर्वरित पैसे लवकर द्यायला सांगितले. त्यानुसार दिघोळे यांनी २७ मे २०१८ रोजी पुन्हा ७ लाख रूपये दिले. कालांतराने नोकरीसाठी जॉईनिंग ऑर्डर दिली नाही म्हणून ओसवाल बंधुंना फोन केला असता दरवेळी वेगवेगळी कारणे सांगून त्यांनी टाळाटाळ केली.
तब्बल दोन वर्षांनी १६ फेब्रुवारी २०२१ रोजी चंद्रभान ओसवाल हा दिघोळे यांच्या घरी आला. त्याने मंत्रालय, मुंबईच्या नावाने झेरॉक्स असलेली बनावट ऑर्डर दाखविली, पर्यवेक्षक पदावर निवड झाल्याचे सांगत त्याने मुंबईला जाऊन जॉईनिंग करु असे सांगितले. त्यानुसार दिघोळे दाम्पत्य मुंबईला गेले. मात्र याठिकाणी साहेब आजारी असल्याचे सांगत ओसवाल यांनी साहेबांशी भेट घडवून आणली नाही. त्यामुळे दिघोळे पुन्हा घरी आले. त्यानंतर मुंबईला चंद्रभान ओसवाल आणि त्याचा मित्र हरताली प्रसाद रोहिदास यांनी मुलाला रेल्वे ज्युनीयर इंजिनिअर पदावर नोकरी लावून देतो, असे सांगत यासाठी आणखी ६ लाख रुपये लागतील, असे सांगितले. त्यानुसार दिघोळे यांनी हरताली प्रसाद यांच्या खात्यावर ऑनलाईन पध्दतीने रक्कम ट्रान्सफर केली. अशा पध्दतीने ज्युनीयर इंजिनिअर पदाचीही खोटी ऑर्डर संबंधितांनी दिली. प्रत्यक्षात नोकरी लागली नाही.
कंटाळून दिघोळे यांनी संबंधितांनी आम्हाला आमचे पैसे परत करा अन्यथा नोकरीची ऑर्डर द्या असे सांगितले. चंद्रभान ओसवाल याने वेगवेगळ्या रकमांचे चेक दिले. मात्र हे चेक वटले नाहीत. शेवटी ओसवाल बंधू व हरताली या तिघांनी आपली फसवणूक केल्याची खात्री झाल्यावर प्रविणचंद दिघोळे यांनी रविवार, २६ मार्च रोजी जळगाव शहरातील रामानंदनगर पेालीस ठाण्यात तक्रार दिली. या तक्रारीवरुन चंद्रभान जवरीलाल ओसवाल, अनिल जवरीलाल ओसवाल आणि हरताली प्रसाद रोहिदास यांच्या विरोधात रामानंदनगर पोलीस ठाण्यात गुन्हा दाखल करण्यात आला.
