यावल तालुक्यातील मोहराळा येथील घटना
यावल (प्रतिनिधी) : तालुक्यातील मोहराळा येथे माहेरी राहणाऱ्या एका २० वर्षीय विवाहित तरुणीने बुधवारी सायंकाळी गळफास घेतला. हा प्रकार निदर्शनास आल्यानंतर तिला तातडीने माचला ग्रामीण रुग्णालयात दाखल केले. परंतु, डॉक्टरांनी तपासणी करून मृत घोषित केले. याप्रकरणी यावल पोलीस स्टेशनला अकस्मात मृत्यूची नोंद करण्यात आली आहे.
सिमरन आकीब तडवी (वय २०) असे विवाहितेचे नाव आहे. चोपडा तालुक्यातील लोणी पंचक येथे तिचे सासर आहे. सिमरन ही गेल्या काही दिवसांपासून यावल तालुक्यातील मोहराळा येथे माहेरी आली होती. दरम्यान, बुधवारी सायंकाळी सिमरनचे आई आणि वडील हे यावल शहरात कामानिमित्त आले होते. यावेळी ही विवाहिता घरात एकटीच होती. याच काळात सिमरनने घरी फवारणीच्या पंपाला बांधलेल्या पट्टीच्या साह्याने गळफास घेतला. हा प्रकार सायंकाळी सव्वाचार वाजता निदर्शनास आला. त्यानंतर तातडीने सिमरनला यावल ग्रामीण रूग्णालयामध्ये दाखल करण्यात आले.
या ठिकाणी वैद्यकीय अधिकारी डॉ. प्रशांत जावळे यांनी तपासणी करून सिमरनला मृत घोषित केले. यावल पोलीस ठाण्यात राजू तडवी यांच्या माहितीवरुन अकस्मात मृत्यूची नोंद करण्यात आली आहे. या घटनेचा तपास पो. नि. प्रदीप ठाकुर यांच्या मार्गदर्शनात पोलीस उपनिरीक्षक सुनील मोरे, सहायक फौजदार विजय पासपोळे, हवालदार राजेंद्र पवार करत आहेत. दरम्यान, या तरुणीने आत्महत्या का केली, हे कळू शकले नाही.
