जळगाव (प्रतिनिधी) – वारंवार मानसिक त्रास देऊन तरुणीला आत्महत्येस प्रवृत्त केल्याप्रकरणी रामांनद नगर पोलीस स्टेशनला एका तरुणाविरुद्ध रविवारी गुन्हा दाखल करण्यात आला आहे. याप्रकरणी पोलीस तपास करीत आहे.
अक्षय रामचंद्र सुरवाडे (रा. पिंप्राळा) हा तरुण रामानंदनगर पोलिस ठाण्याच्या हद्दीत कुटूंबासह वास्तव्यास असलेल्या तरुणीला, माझ्याशी प्रेमसंबंध ठेवले नाही तर मी आत्महत्या करून घेईल आणि तुमच्या कुटूंबाला अडकवून टाकेल, अशा वारंवार धमक्या देत होता. तरूणाच्या त्रासाला कंटाळून १९ वर्षीय युवतीने राहत्या घरामध्ये ओढणीच्या सहाय्याने गळफास घेवून आत्महत्या केली होती. ही घटना शनिवार, दि. १२ मार्च रोजी रामानंदनगर पोलिस ठाण्याच्या हद्दीत घडली असून याबाबत युवतीच्या आईने उशिराने तक्रार दिल्यानंतर तरूणाविरूध्द रविवारी रामानंदनगर पोलिस ठाण्यात आत्महत्येस प्रवृत्त केल्याप्रकरणी गुन्हा दाखल करण्यात आला आहे.
